Papa Shangpughang Leo 14 cuh Htahtana bi a bi nak man ah Peru ah hteit tu ba hleih akkak noh dò chàng ci gui.

Vatican Amoong KThai noh a pyéin nak ung Pope Leo 14 cuh Argentina ah kho khngüp 4 a hteh nak ngpäng hleih November 11 ung Peru kho ah gok ci.Argentina kho Buenos Aires ung ka noh kho k’ói 2:38 ung ngdüi lo neh mü hngün khngi mkhin 5:1 ung Lima Manggo
Callao K’khân k’yong ngpung ng’tâinak ung gok ci.Tuh kbäih Peru ah a hteh cuh Htum America ghunkho kthum ah a hteh nak ung kah akhngu pi ah kya ci.
Pope cuh Peru Hluki Keiko Sofia Fuji Mori Higuchi,Ghunkho hei mòòng vonki Carlos Espa lah k’khân k’yong ng’vái gakkap gui on do ci gui Akhmo khngih noh kcheipai pok m’oi neh do ni neh akhmo gui 27 cum boi ca Sinfonia por El Peru ng’äi nghtoi no tum neh ng’äi neh do chang ci gui.A cun ah a lo yah ung Pope ngdüm netah kä kchang kchu ci gui lah akhmo gui cuh kongki pe gui ci.
Papa Shangpughang cuh Peru ah khngüp 11 ung ka noh 16 ah chüt kho khngüp 6 om neh Lima,Chiclayo,Cusco lah Pucallpa hteit neh Htahtana ung ngkhot ng’et neh atäng bi man te ci gui on nghnguh ba kha gui.Pope cuh Augustinian nghtoi ung no Sayataw ah kya lo neh 2015 ung ka noh 2023 ah Sayataw bi bi neh om ci.
Mü hngün khngi mkhin 6:15 ung Peru Hluki on Hluki Im ung nghnguh ni neh mü 7:45 ung Lima Grab Teatro National ung acoyah ng’vái gui on nghnguh khai.Do chang ci gui cuh Associated Press noh a pyéin nak ung täm 3 hlok lo khai ci ci.
Pope cuh November 12 khongoi khngi mkhin 9 ung Peru Sayataw gui on nghnguh Khai gui.Khongoi 10:20 ung Lima Cathedral ung Boiphaya,Mamah gui lah Seminarian gui on ktaigünak bi khai gui.Khongoi 11:30 ung Peru ktu gui noh ma lam ah ami äp vai gui lah ng’cet ci gui ah mòòng pyéin Khai gui.Mü hngün khngi mkhin 6 ung National Stadium ung ktaigü khai gui.November 13 Chiclayo Mânggò,Pempas de Pimentel ung khongoi 10 ung kchang k’hli on Missa gän àp khai kya ci