Bä ciah Nicholas ah ghünlu a mòng
Bä ciah Nicholas Christu Kum (3) yah ung Asia Minor ung om ciah Patara maanggo ung ng’tüi ci. Turkey maanggo, Myra ung Taigü Maang ah kya ne Khanpughü mong lam bi khai ah a mi hmoh ah kya ci. A mi pa no dukhaih hma ne a hta hngu mi k’thum am kä gunghtot ba hnging ne kä ni ci ah bi bi ne ngui a mi shui vai ah pyien hleih a cun hmat ciah Nicholas noh ghui ng’ip tu hmat a cun ah k’chang ah im m’khot ung ghot ne ghon pe gui ciah kya ci. K’thum vei a cun ah gunghtot gui hleih a cun ah a hta hngu mi k’thum cu a mi van kyawn khui khoi ne om ci gui ah kya ci. A ni pa no ngui ng’ip ng’chaak peit gui hti ciah k’chang cu a u hmat hlü ne k’äi ne m’htih yah ung Nicholas ah kya ci ci cu hmat a kya ah yei tu ciah kya ci.
Nicholas ah ng’ming awn gänap ne a mi coh ah phaya kyawng gui cu k’pyha khei ciah kya ci. England ghunkho bäng ung k’pyha k’phli om ciah kya ci. December k’cha a k’hngüp nak a gok lo ba täi hlei letsawng hta gui tumat no tumat am pe hleih Nicholas ah poi cu yeikyai ne bi ci gui ah kya ci. Ng’äi gui guk ciah Benjamin no Nicholas ah a mong gu ne ng’dang khai ah bi man ciah kya ci.Bä ciah Nicholas cu Christu kum 350 ung shih tu pang lang hlei phih a ni ah k’chü m’gein nak lah ng’khai nak ah m’lung cu kho m’dek pum ung a ng’ming thang lo ciah kya ci.
Christu kum 1087 ung Crusade ng’tuk nak om lo hleih a ni a mi k’phuh nak ung ka noh lat ba u ne a mi hnguh ba ah a guh gui cu Italy ghunkho Bari ung a mi m’kon ba ah kya ci.19 century ung Dach Protestant gui no Taigü Mang Nicholas ah ng’ming Sancta Clause ci ne a ng’ming chü u ne a k’cum ah yei kyai ne om ne Christmas letsawng gui k’cang gui am pe gui ciah van no a hmat lo ah kya ci. Bä ciah Nicholas cu hlü ciah k’chang gui am peit tak gunhtot nak awn a kya ah ng’khai ciah k’chang tu mat ah kya ci.
