Kei cuh, lam lüng-ah ka kia ci. A k’càng lüng lah, Hngùn lüng-ah phih ka kia ci.
Kä cäi èin vä. Khãnpùghí zùm äp vä. Kei phih na zùm äp vä. Ka Pá-ah im khàw-ah, ih omnák vai a k’dá om ci. Kä cun ung ka piéin pi khai hlü. Nami omnák vai, piàng vai neh ka hteit ci. Nangmí-ah omnák vai, hteit neh piàng nehtah ka omnák-ah nami om tu vai-ah, ka ning la lo tu bà gùi khai. Ka htehnák-ah, päng ci-ah lam cuh, nami hmat ci.
Thomas nawh piéin neh, “Báwi aw, a hòi na hteh vai kä hmat mùi, i-ho k’chà-ah, lam kami hmat hnging khai ang?” ci ci. Jesu nawh, ani àm a piéin cuh, “Kei cuh, lam lüng-ah ka kia ci. A k’càng lüng lah, Hngùn lüng-ah phih ka kia ci. Kei kä na ng’leh na neh a u phih ka Pá-ah kä gok hnging ci. Kei nami na hmat-ung, Ka Pá phih nami hmat khai. A tuh-bäih lèng neh, ani hmat neh nami hnguh lo pi ci.” Philip nawh, Báwi aw, Pá cuh, nà k’hmuh gùi ung zèi tu vai hlü,” a ci. Jesu nawh, ani àm a piéin cuh, “Tuh güt nangmí awn ka om lo tu ci. Kä nami na hmat ci ang, Philip aw? Kei na hnguh tu ci nawh Pá hnguh tu ci. Keimí àm, Pá na k’hmuh tu gùi-ä, ci neh a i-ah na piéin lo ci ang? Kei cuh, Pá ung Pá cun phih, kei ung a om cuh kä nami zùm ci ang? Ka piéin-ah k’chü gùi cun phih, ka mät-ah k’chü-ah kä kia ci. Kei ung ghing om ci-ah Pá mät nawh, bi gùi cuh, bi ci-ah kia ci. Kei cuh, Pá ung ka om, Pá cuh, kei ung a om cuh, zùm vä.Kä cun ung cun-ah bi gùi mät-ah phäh-ah zùm vä. Nangmí àm a k’càng-ah ka piéin cuh kei na zùm ci nawh ka bi-ah hlo bi law tu khai. Cun-a tah bä pí púi ci gùi, bi m’chüt khai. A i-ah kia hleih ci ung, Pá-ah ka hteit khai-ah kia ci.
