Bä ciah George ah ghünlu a mong
England Ghungkho ghung m’htei ciah Bä ciah George cu Cappadocia mânggo ung ka cang lam ah phäh ah a hngun pe ciah bä ciah k’chang tumat ah kya ci. Kho k’hngüp ät ung bä ciah George cu a kya ah kyühkyok vai ah Naka nu tumat no m’kyüh hleih Libya ghunkho ung om ciah Sylene mânggo ung gok ciah kya ci. Mânggo k’om gui no a cun ah kyühkypk vai ah kya ciah Naka nu am a k’hngüptäi hleih hto k’hngih hti ah a mi gänap ah kya ci. A k’hngu ah a mi gänap vai ah hto gui cu ni hleih kä om lo ba hleih a k’hngüp täi ca lik hta la ne ta gah ciah k’chang no a gänap ah kya ci. Kho k’hngüp ä tung a cun ah ca lik hta cu Shangpughang ah hta k’hngumi no a gah ah kya ci. A cun ah kya hleih Shangpughang ah hta k’hngumi cu Naka nu no a ei vai ah hteit ciah kya ci. Cun tu pang ah phih Bä ciah George no a cun ah Naka nu cu k’htei awn shun ne ngon hleih Shangpughang ah hta k’hngumi cu shih nak ung ka no lot ciah kya ci. Shangpughang no a hta k’hngumi k’pyhon ciah George am ghui ngui lah a phu däm ciah khoh tang gui awn a shum hmat ba ah kya ci.
Bä ciah George a cun ah a phu däm ciah khoh tang gui a ni am a peit ah k’dam ah do dong paca ci gui am a peit vai ah k’nga k’phlang ciah kya ci. Bä ciah George no a cun ah a cu ah phäh ah Christian k’chang gui a k’da ah kya lo ne m’shi nak ci tu ci gui ah kya ci. Christu kum 303 ung a kya ah k’chang gui kalu na ne ngong shep ne ci nak cu leng lo ciah kya ci. A cun ah kalu nak gui om lo hleih a m’shah cu Christian yum nak nong ba ci gui ah kya ci. A cun hngu ciah Bä ciah George cu a ni Christian tumat ah a kya cu k’chang gui no a mi hmat vai ah Palestine ghunkho, Diospolis ung kyühkyok na kä om ein hleih hteit ciah kya ci. Roma ga k’kap a ng’vai no a kya ah hlen ne ng’ling ciah m’shi m’ghuih ne kalu na ne ta a k’hngu ah a lu k’ke m’chünpit ne a ngon ah kya ci.
