Bä ciah Alexander ah ghünlu among
Bä ciah Alexander cu AD 250 ung ng’tüi ciah kya ci. AD 451 ung Jerusalem mânggo cu a k’hma nak mânggo k’däm tumat ah kya lo ci. Pa ng’vai nu tumat cu a kya ah ng’shong ciah kho ung om ci gui ah ng’müi m’cha lam a ni bä nak vai ah teng ne m’htei m’hta gui ciah kya ci. Alexander cu AD 312 ung Alexandria mânggo ah Pa ng’vai tumat ah kya lo ciah kya ci. A ni no leng ne a bi loh vai gui cu a kya ah lu k’chok ei khai ah dâ ciah kya ci. A cun yah ung hlüntai nak, ngoh nak gui a kya ah ng’ya hlü ciah Arius no a ngoh nak vai kä gah tu ne ta Alexander cu ng’vok a ghüh tu ah kya ci. Alexander ng’hngu ng’tuk püi ne ta a kya ah kyüh kyok vai ah a hlü hlü k’puk ne a ci lo ah kya ci. Arius no a ni ah Arian yum nak lam ung ng’cu ng’va nak gui om khai ah a ci ah kya ci. A k’tung pi ah a mi ng’cuh ng’vah nak cu Boi Yesu ah bi a bi nak lah Khanpughi lah k’chang ah a kya nak nak ah mong ah kya ci. Ngami no a mi m’thei m’thang cu Boi Yesu cu Khanpughi ah kya ci. Cun tu pang ah phih Pa Khanpughi awn ät ciah kä kya ne Pa Khanpughi ah ta a pi ah nem tub a ci ci ne Arius no m’thei m’thang ciah kya ci. Boi Yesu ung Khanpughi ah kya nak a k’be kä om ci.
K’chang ah kya nak phih a k’be ah kä om ci. A cun ah a k’be ah kä om nak goi ah ng’lak ung tumat mat om ci ci ne Alexander no yum ciah kya ci. A cun ah ng’cu ng’vah nak ung Arius awn a k’ni ah ng’hta ng’ko hlü ci ne k’tha nak ciah kya ci. AD 325, May k’cha ung Nicea mânggo ung yum nak a hei hei gui khong mang ci gui no a mi bi ah ng’bum nak cu a k’tung pi ah kya lo ciah kya ci. A cun ah ng’bum nak ung Arius cu a u no kä k’bäi tu ah mong lam gui pyein tu ciah kya ci. A cun ung ng’bum tu ciah Constantine no Boi Yesu cu tüipyan nak nak gah ciah kä kya ne ng’tüi lo ci ci cu k’bäi ne Boi Yesu cu Pakhanpughi awn a täng ah kya ci ci cu yum ciah kya ci. Cun kon ah Nicene Creed ah a k’tung pi ah m’thei m’thang nak gui van no a k’bäi hnging vai ah ng’bum nak cu bi ba ci gui ah kya ci. A mi ng’bum nak gui ng’päng lo hleih Alexander cu a kya ah bong bai lo ne shi ciah kya ci.
