K’Chò K’Khúishûi Lâlêi 4
K’Chò K’khúishûi lâlèi m’tùmtäng gui cuh u noh phih kä gu pha ci.K’Chî ng’thû m’gòng düt on ami pyéin laih laih ah kya ci.Cun gui cuh Kyànca ung K’Khúishûi gui,Béit Micäì gui,Ni Kshé mcha neh Hnguh Hmat gui ciah pyéin ah Proverbs,Wisdoms,Ecclesiastes gui on amshah täng ci.K’Chò kkhúishui gui cuh Bòiphaya Jordan bäng noh KChò English Dictionary ngthû kphlàn a guk nak ung mkù hlok bòi ci.Akcàng ah KChò kkhúishui gui cuh yümyüm ah guk ung phyâ kchüih phlàn khai kya ci.Acun ah kkhúishûi gui cuh akní ah kphlàn neh gujk ah akya ni ca ca ngbú tumat ah kya neh hnguh hmat ngah-tüh nak a hlü hlü na pe gui neh ni bä nak gui mi gah khai kya ci.Acun ah kkhúishui gui cuh(A)ung ka noh(Y) ah chüt hleih a ngtäp ah ka guk cuh phya kchüih ghep lo ca kya neh cun gui cuh kchî ngnéng on akní ah kphlàn neh guk vai hlü ci.A i ah kya hleih ci ung akdá pí cuh thúk ca kya neh tuhchŭ kchàng akdá pi noh kä hmat hnging khai kya ci.Tuhkbäih cuh (B)lah (C)on lèng neh kkhúishui gui guk vai kya ci.Bâ lah ghà ah ngvók ah.Bü lüng noh a nú khit neh ngngaih nak noh a mcà khit ci.Bâ mshí mit khai mthak ci.Bêi kphyìm pyéin ah bêi ka nak.Bü neh shun teng neh kdaih.Bôinu ngbüng phàishè kbah.Bêimah ung ung bêi ngbäm neh shé kòng ung tuilì ci.Bi ät êi ghôm.Bèi a däm on i kä mchüt yun a bgshäî on khò kä kphâ.Beshoh ung phih mghêm ba neh ngtän ung phih phä nghläi ba vai.Kbäí neh taih hngô nglé man ci.Kbìhlî ngtâ chütah ami mtâm kohyäih mäih ah.Kboinu khui ah ka hngo ngdáng man ci.Kbìgì ung ngthün neh mvui pum ung ngthün ci.Kbäi neh taih ah mäih ah.Kbigi a teih nga yong a coih.(C)on lèng ah kkhúishui gui läi cuh:Cá kah ui shu hlî.Cung ci a hnga gi ci ahei.Cá kah kkhahta hmat.Chàng tu netah a khlüh phok tu neh tah a kkhäk.Cùm gì noh a nú chúm ci.Ngngaih vèing noh akcá na ci.Chùm goi noh ani yu hlu ngcuh ci goi ngdók goi noh ani hngang lam ngcan ci goi.Cung läi noh kchu man nglo neh kpong hlei kpon man.Cá ka mei lák tu.Cèimah vai lah vok hta.Cá ka hta shu yùm.Cá ka ui shu hli.Cä voh lah pêm ah kya kon ah.Kchì ngchüng yang tui ngpai.Kcuk noh na kcuk ba ci.Mcúm goi ah ngphuih.Mcüm kbüh ah hta lak khláng dan ah kho kai.Kcê oh phih a k’om va kkoih man ci.Mcüm kho kdang.Mcüm neh kdang káp ci. Chùm ah kkòi phih kkòi yong ah na phih na. Kchong ngdüi neh kchìng kyu ci.Shin ah KChò kkhuishui gui cuh KChò Thùng bäng ah kä kya en hleih pahta mòòng mthêi mcäì nak gui unh phih htung mang khîn ah kya ci.Nu pa gui noh phih kyai Saya gui noh phih kyai ngshä ngbang ci gui noh phih kyai ami pyein shàn ah ni bä nak na pe gui ca a phù kyüi ca ngthu kchi gui ah kya ci.
