K’Chàng ah htìnglìng mòòng christian lam ah m’thêimthàng gui.
Christian yumnak lam on kchang mòòng mthêimthang nak ung kchang gui ah ghinlu amòòng kcang,ngyung neh däm tàinak,bü cèngnak lah akhngu ah bü cèng nak gui a ngkhái ah mthei ci.
KChàng cuh KKhanpughi no a müi kthéing on täng khai a tüî ciah NgThukni noh mtheimthang ci.Cun ah kya hleih kä shi hnging ca mcha shäm ci gui.Kchang gui ah ghinlu cuh akya ah thúk neh akhotüi phlàn ca ghinlu shäm ci gui.Cun kon ah kchang gui ah akhngu pi bü ceng cuh shin ah khomdek ung phleh vai kä kya neh ngdün neh ghin vai ah kya ci.
Christian gui ah mtheimthang nak ung phih kchang lah Kkhanpughi ah nglak ung ngshünngohannak mtheimthang ci.Cun ah mthei mthang nak gui cuh KKhanpughi ah akkhang mdangnak(Divine Revelation)ah kkhan ah ngyung neh mthei ci.Cun ah hlo ah shui ktäih nak cuh(Theology)ah pyein ah kya ci.Vang ah pyein ung yumnak ah htikpan(Science of Faith) ciah hnguh hmat nak tumat ah kya ci.Cun ah hnguh hmat nak ung kchang ci cuh Kkhanpughi ah müi on täng khai a tüi khmüt ah kya hleih kchang ah ghinlu cuh 1.Kkhanpughi lam ah bü ci.2.Tui khmüt neh a kphyon ah kya ci.3.Bä cang ci lam bü ci.4.Mhnginak ngya hlü ci.5.Akni lam bü ci.6.Ngkyüm ngpäng nak ah bü ci.
Papa Shangpughang Johan Polu akhngih nak noh”Htahtana ah mtheimthang nak gui cuh kchang shing ah bä cang pi ca hnguh nak on hlüng tai pi ca kchang ah tanphu mdang ci ciah pyein ci.Kdäih neh Pope noh ”Hnguh hmat kchang gui cuh akhotüi khe ca kchang ah ghinlu lah bü ceng nak gui kä shui ktä hnging ci gui.Kchang hlu moong hlummlei moong ghunkho moong ciah kchang ah om moong tumat bäng on kchang ah ghinlu akcang lah bä cang nak gui,ngkyüm be ca kchang ah ghinlu kphlan neh kä mdang hnging ci gui.Akhotüi khe ca kchang ah bä cang nak lah bü ceng nak nong neh kchang ah ghinlu ah bä cang nak shui ktäih neh kä gah hnging ciah mthei ci.
Cun ah. kya hkeih kchang ah ngtüipüi kchang ah bä cang nak,bü ceng nak gui cuh NgThukni,Htahtana Pa ngvai gui ah mtheimthang gui lah htahtana ah kchang hlu moong mtheinak gui ung hnguh hnging ah kya ci.Cun ah mtheimthang nak gui am ”Kkhanpughi ah akkhang mdang nak(Divine Revelation)ah chü ah kya ci..
Kkhanpughi ah akkhang. mdangnak (Divine Revelation)gui ung Jesu Christu cuh”NgMüng Van lah kchang ah hngün om moong ah a nglung kthük ciah a mthei mthang ah kya neh Christian gui ah kchang moong ci cuh Jesu Christu a nglung ah tha ca yum moong hnguh hmat nak ah kya ci.Jesu Christu cuh bä cangnak lah kchang gui ah phäh ah ngkyüm be ca theibang vai ah ngdang ci.
Cun cuh Boi Jesu a nglung ung tha neh kchang ah ghinlu ktä ca kchang hlu pyinnya(Christo Centric Anthropology)ah chü ah kya ci.
