

Bä ca Cecilia
Bä ca Cecilia cuh tumkhong ci gui kyum’htei gui ca Bä ca k’chàng ah kya ci. Ani cuh Kum (2) a kya ah ung Roma Mang-Go ah Bäng’mangk’chàng kyonkhui ung ng’tui om lo tu ci.
Cecilia cuh Khâpùghü ung amät noh amät ap neh om khai ah ng’gün nak bi ci.Cun ung phih aNu lah aPa noh Valerian ci awng ami m’cum goi. Acun ah Imkyonkhui am’düh k’hngüp gei acei Valerian cuh Shihla ah toktap nah ung kä om neh Khânpùghü ah ang’yahhlü niläk khai ci ah ani püi.
Valerian noh phih cun ah ani püi cuh Yum neh Läk tu ci.Bä ca Cecilia cuh amät om tu nga neh Pa Khânpùghü cuh acum ah ng’ä cu neh m’hlümm’tai ci.A cun ah ung Khânhtapup hta noh Papai Luk’chüm abüm lo.
Bä cac Cecilia ah Shuhshan Taigü nak ung ani ah a cei Valerian cuh m’shinak Sacramentu Lah tu neh Yumtuk’chàng tumat ah kya lo tu ci.Cecilia ah acei ah nau cu ah kya ca Tiburtius cun phih ng’thonng’hlat lo tu neh m’Shinak Sacramentu Lah tu ci.
Kum (192) ung Commodus Shangpughang noh Catholic gui dudei nak gui neh ngon,phat lo gui ci. Acun ung Valerian lah anau Tiburtius ni cuh phatgoi neh Pagus Triopius ciah Roma Mang-Go ung kanoh api hla ci yah ung ami ngon goi.Angani ani shih kä sho pha hleih Cecilia cun phih ami pha.
Bä ca Cecilia cuh Shangpughang Prefect Almachius ah amaa ah khaihpui neh Cecilia ah ayum nak anon vai ami pyein. Bä ca Cecilia lä cuh ayum nak aphäh ling-gai lo pi hti hleih ani ah angü ung (3)vei m’gan noh ami chün.
Cun phih Cecilia cuh kä Shih neh PaKhânpùghü cuh ng’äm’cu neh m’tamkhah ci. Khohngüp (3) sho lo hleih Bä ca Cecilia cuh Shih ci.
Ani ah agoh cuh St.Calistus Phayacong ung ami büh. Sholo hta hleih Trastevere ah om ca St.Cecilia Phayacong ung ami plaon bah.Bä ca Cecilia cuh kum (1599) ung ngo ip ci vai hlui ah kya ci.



