K’Chòkhò a ng’ling lo lah K’Chò K’Chàng gui.
K’Chòkhò a ng’ling lo cuh a khòmdek púm a ngling lo on ngphàk ci te cuh mi mät gui noh mi plohkheih gui phih cùm bòi tu ca kya ci.Khòmdek lah k’chàng gui ami ng’shün ng’phan ah mòòng bä ca ngthûkní kyanca ah mthêimthàng nak gui ung i ah a mdáng mi ngshîkcà hnging ci.Ngtüî om lo nak ung mà kbäih neh a mdáng nak ung kchàng cuh Kkhânpùghí noh a tüî vai a pongpüî mdáng ci.Kchàng khngumi lah kchàng k’pámi a tüî khmüt kòn ah Kkhânpùghí a tüî khmüt teng netah akya ah ni ciah mòòng hngu ci.(Ntüî om:1:31).Bä ca NgThûkní ah mthêinak ung Kkhânpùghí cuh Kchàng gui ah kkhân ah mhngînak akbé thà neh mhngî nak akbé on a mät ah müí ah hló ah kchàng a tŭî khmüt cuh mdáng ci.(Ngtüî:1:26)Ashin ah mòòng teng ah akya ung chàng gui ah htìnglìng chüìkhá nak cuh hmat hnging ah kya ci.Kchàng cuh khoh-thêm ngùi ghùi ah kä kya neh kchàng shing tumat ah kya ci.K’hàng cuh amät ah mòòng a mät noh hmat hnging neh a mät noh a mät shäm neh a mät ka vai ah a bü ah pe ta hnging neh ahei ghinlu täng ca kchàng gui on ngpòngng’óp hnging ah mòòng bi hnging ca m’yung kthá shäm kò neh thà ci.Bä ca kchàng Papa Shangpùghang akhngih nak Johan Polu noh Tüì KHmüt ca Bói Kkhânpùghí noh kchàng gui ah kkhân ah a thà ah chà tu hngá ca mhngî nak ah phäh ah kchàng khngûmí,kpámí päng kkhân ah nüt dòng neh kä gah hnging ah htìnglìng nak a péit a ap ah mòòng pyéin ci.Kchàng gui ah htínglìng nak ah mòòng khän neh ghùng mhtéi ci gui cuh Christian pahta kchàng gui ah ami biloh gui ah phäh ah thúk ca mdáng nak gui hngu hnging ci gui.KChàng tumat htî ah ghinlù cuh akya hlü hlü ah kya ca khomdek ah nglung ung ngväí tu ca kä kya neh a ngyüvü capkà ah om lo nak ah kä kya neh kä ngpyî ngpäng hnging ca a ngphyúi ngvèing ah phih kä mdáng neh Tüì K’Hmüt ca Kkhânpùghí cuh kchàng tumat htî am shin ah pyéin hnging ci.Nang cuh na nú ah pukkhùi ung kä na ngthüî phâ gé ung kaning hmat ci.(Jeramiah 1:5)Mikmi cuh nù ah pukkhùi gé ung kä mi ngtüî phâ gé ung Kkhânpùghí ah mlùng ung mi om ci.Acun ah Kkhânpùghí noh ana tüî khmüt gui yah gé ung akní ah pongpüî netah tumat htî ah ana tüî gui ah kya ci.Kkhânpùghí cuh kchàng pängpäng a tüî vai ah bü cèng neh mhngî neh a tüî khmüt ah kchàng phùng cuh Kkhânpùghí ah phäh ah hlü ci gui ah kya hleih mikmi KChò gui cun phih mi om nak ah KChòkhò cuh a u noh a i ah a mdí ung phih mi pyàng tham tu khai kya ci.
