Ngtukkhò lah akhòtüî ah dínak
Myanmar ghunkhò ung ngtukkhò cuh Kchòkhò ung Mângtat ung lèng lo neh atuhgüt chüt hleih kkhân k’yòng noh pùng akkchák laih ah phäh ah dí shùm ci gui akkhak om lo pí htî ci. Mà kbäih neh kkhân k’yòng noh kä kchák phâ ung hlêhnget kdäm gui on a ngkyìng gui noh ami ngngaih ah pìgò gui ami kah lo ung tün neh khngät phih kä büì man ah gôigê nak a hlü hlü om lo ci. Mneh m’oh nak ahlü hlü cun phih hnguh lo ah kya ci. Avai hlü ah mthoh noh akkthün vai hlü ah phih kya neh guh-gò kkhìng kthang ghok nak ahlü hlü om lo ci. Cun kòn ah géitkò gui phih akní ah kä ngtheih pàì kä ongngtangbà ci. Htàng k’hlèn gui phi ngo neh kä tak ba ci.Nglung ngmà gui ah kya ca mlúi,kbéi lah mkyéi gui phih akní ah kä ngtheih tak ba ci. Cun gui ah akya lo cuh a ngkyìng k’hlùi gui noh a m’än a hlü hlü om ca pùng gui ami kchák ami kah gui ah phäh ah kya khai ciah ah Kchò Kchàng gui noh ngngài ci gui.
Cun kòn ah kyòng im gui,sèikhat gui pâhtâ mòòng kyòng im gui néng neh pùng on ami kchák ah phäh ah kyòng kkài gui cuh bung yung ah phung tuh neh kyòng ami kài ah phäh ah mkhuh khmat a hlü hlü,gôigê nak a päng päng om lo ci. A i ah kya hleih ci ung bungyung ah a m’äm a hlü ahngäî om ca kpí gui ah hngú ah kài u hleih a cun gui noh ami htuih ah phäh ah góigê nak akthái gui ami gah lo ah kya ci. Tuhkbäih a cun ah gôigê nak gui cuh Covid lèi ah tah phih ngghüt tu ba hleih bùi ci gui akkhak tu ba cuh kchâ lüng hngô neh ngkùng ci gui ah kya ci. Acun ah a ngkyìng k’hlùi noh kkhân k’yòng on a kchák ah pùng ah phäh ni,hlêhnget kdäm gui on a kah khaghok nak gui ung a m’än gui i hlok ah ayat cuh u noh kä hmat pha hnging ca kya ci.
Ngleimdek ni,shingghing,khùmhlâ ni,kphyú kkhá,kkhìhlá,mkyüt mkyap gui lah tûi ung om ca kîkòng,ngá,k’âi ah chüt hleih ngtuk nak ung mang ah a m’äm noh a khò tüi pèi ngléng i hlok ah a dí cuh u noh kä hmat pha ca kya ci. Cun ah Kkhânpùghí noh a tüì ah kchàng lah a khò tüî pèingléng kä dí en ba khai ci hnging ci cuh a Kkhânpùghí mä ah vah kya ci. Yùm ktû kchàng phùng noh nghûi ngpâ ktàigü neh ngtuk khò a ngpäng hlah vai lah Kkhânpùghí ah dìm kyäp nak ghunkhò ung a om hlah vai ktàigü vai ah khîn lo ca kya ci. Cun ah ktàigü nghûi ngpâ nak phih a ngnéng düt ah kä kya en hleih a ghunkhò púm ung om ca htahtana ngvái gui noh nì na u neh akchün ah eî hlôi ktàigü neh Pá Kkhânpùghí ah dìm kyäp nak a om lo hlah vai ah bi vai khîn lo ca kya ci.Cun tu láng pang ah phih Kchòkhò a dìm kyäp ba vai chà tu hngá ca Kkhánpùghíah ni bä nak cuh kum 2025 ung ngdáng lo ci.
Cun ah a mdáng nak cuh Kchòkhò Htahtana Khòngmàng neh dìm kyäp khai na ktàigü püî gui khai ah Catholic Htahtana noh Ktàigü Mâng Ktùng Augustine Yòm Ghùng a na mdüih péit gui on hnguh hnging ah kya ci. A ghunkhò púm ung kä ni ca gá tuk nak ung mà kbäih neh ngdüí lo ca Kchò Kchàng chùi hlò gui khai ah Kkhànpùghí noh a ghü lo cuh cá Kcä Pùghí Ghung Mâng ah a kcä a ngkyüm bé lo nak ah phih kya ci. Ani noh a kcä cuh Kchò Htá noh pînlê tûi ung a kkhìm ktah lo khai ciah a kcä cuh ngkyüm be lo ca kya ci.
