Mopi Ghun Kho
Bawi Yeisu cuh kho kum thumkyip be lo hleih ama mong gui abi vai cuh chin lo ci. Bawi cuh bä ca k’ce ng’shä John Babtista cuh hteit neh hnguk ci.K’chang ak’da cuh John Baptista-ah m’thei m’thang gui cuh hnguh ng’yak tu vai neh m’shi m’theing nak gui cuh gah tu hlü u neh gok lo tu ci gui. John cuh k’phion ca Bawi ci neh ng’shak hleih yum ci gui. Cunte ani noh kei cuh ma lam m’thein ca k’chang-ah akia-ah mong cuh ng’hten khai-ah m’thein gui ci. Bawi Yeisu cuh k’chang gui-ah kat nak-awn atäng-ah thüi hlei neh ngami gui-awn atäng-ah cun tu püi gui hlü neh jotaan tui nu-ng m’shi m’theing nak cuh lak tu ci. Ani cuh m’shi nak alak tu yah-ung Hti theing ca Muh Khnapughü cuh kyum lo neh “ Shin cuh kei-ah Ka m’hngi pi-ah ka hta nei” ci-ah K-ah khanpughü k’aw cuh ng’yak ci gui.
Cun kon-ah Bawi Yeisu cuh kho k’hngüp k’hli kyip suh shan nak lah kyün hloi nak gui cuh bi vai neh hla lai ma-ah hteit ci. Abi lo vai cuh khak khai-ah hmat neh ng’pyang tham ci. Kho k’hngüp k’phli kyip be lo hleih kho k’nget noh tawk tap vai neh gok lo neh ahlü hlü-ah cam neh hmong cang ci. Bawi Yeisu cuh apa Khanpughü-ah ang’yak hlü bäng cuh abi vai-ah m’lung hnga om ci. Bawi noh kho k’nget cuh k’täm neh hlot ci.
Yeisu Bawi cuh hla lai ma-ah kah lo ba neh galile kho avan-ung hteit neh ng’thu k’ni cuh m’thein m’kan gui ci. Bawi noh m’htung k’khan gui, tui long k’kam ghawi gui lah k’chang k’hli ng’htoi neh ami ng’bum nak gui, ng’bum ng’tang nak im gui-ung m’thei m’kan gui ci.
Bawi Yeisu noh Khanmopi-ah gok nak vai lam gui, Khanmopi-ah mong gui lah Khanpughü-awn ng’pak hleih k’cheng neh cang ci gui cuh k’chang gui-am m’thein gui ci. Khanpughü noh k’chang gui am’hngi gui-ah mong lah kat mah k’chang gui a yei nak-ah mong cuh m’thein gui ci. Khanmopi-ah om ca k’chang gui cuh phan-ah k’chang gui-ah kä kia neh Khanpughü-ah hta k’hngu hta k’pa gui-ah ami kia-ah mong, Khanpughü-ah m’hngi nak cuh m’dang vai-ah hngun ghün om nak cuh om ca akia-ah mong, ngami cuh kä yei nak ci gui-ah k’chang gui cun phih yei na u neh m’gein u neh suh phih shan pe ci gui-ah mong, cawi gha ci gui lah go pai ci gui-ah k’khan-ah i hlo k’cha ami om ih te-awn teng neh m’cha m’lang nak gui cuh bi ci gui-ah mong cuh m’thein gui ci.
Bawi Yeisu noh ahlu läk gha lei goi m’düih neh ngami gui-awn atäng-ah om neh ani-ah mong m’thei m’kan khai gui-ah k’hlüm neh k’hmawh gui neh m’shi k’pio nak, ng’thu k’ni m’thei m’kan nak gui bi khai gui-ah ghü gui ci. Bawi noh m’neh m’awh nak thüi hlei nak, vuuk kat nak, shih nak gui cuh bui awt khai hmat tu lang neh apa Khanpuhgü-ah ng’yak hlü cuh m’htei neh läk ci.
