33rd Kyün k’hngüp ng’neng ng’thu k’ni.

A i-ah kia hleih ci ung a k’hláng-ah hteit lo vai neh a phàn-ah k’chàng gùi chü gùi neh a khawh-tang gùi pe gùi ci-ah k’chàng-awn täng ci. Cun-ah k’chàng gùi nawh ami m’chüt hnging hlok hti-ah, tumat-àm talent k’hmà, tumat-àm talent k’hngih, tumat-àm talent mat pe gùi nehtah a k’tén-ah hteit ci. Talent k’hmà gah ci nawh hteit neh hlum-m’lèi neh a ng’khap-ah talent k’hmà gah lo hngá ci. Talent k’hngih gah ci nawh phih, a ng’khap talent k’hngih gah lo hngá ci. Talent mat gah ci läí nawh hteit neh m’dek-ung khùi co neh a Báwi-ah ngùi k’phuh ci. So-lo htá chü-tah phàn ah k’chàng gùi-ah Báwi lo bà neh ami bi-loh-ah màwng ng’si gùi ci. Ngùi talent k’hma gah ci nawh k’et neh a ng’khap talent k’hmà pe neh, “Báwi aw nang nawh kei àm, ngùi talent k’hmà nà na péit te, a ng’khap talent k’hmà hngá hleih ka gah ci,” ci neh piéin ci. A Báwi nawh “Bä ci. A k’ní-ah na bi ci. Nang cuh, kä i-htá a k’ní-ah na bi ci-ah kia hleih a k’dá púi na bi vai-ah ka ning pe khai. Na Báwi-awn zèi kiài neh èi-mãng tu-ä,” ci ci. Ngùi talent k’hngih gah ci nawh phih, k’et neh “Báwi aw, kei-àm ngùi talent k’hngih nà na péit te. A ng’khap ngùi talent k’hngih ka gah hngá ci,” ci ci. A Báwi nawh “Bä ci nang cuh, na bä ci. Nani’ci. Nang cuh, kä i-htá ung a k’ní ah na bi ci-ah kia hleih a k’dá púi na bi vai-ah ka ning pe khai. Na Báwi-awn zèi kiai neh èi-mãng tu-ä,” ci ci. Ngùi talent mat gah ci nawh k’et neh “Báwi aw nang cuh, ka k’hma neh kä na géitnák-ung-kah át neh kä na phúnák-ung-kah na khäm man ka hmat ci-ah kia hleih Kiü-neh a hei-ah hteit neh na ngùi talent mat m’dek-ung, ka k’phuh tuh-bäih na ngùi om ci néi,” ci neh piéin ci. A Báwi nawh phih ani m’sàng bà neh “Se-neh k’thá ci-ah k’chàng kä ka géitnák-ung-kah át neh kä ka phúnák-ung-kah ka khäm man na hmat ci. Cun-ah a kia-ung, ka-ngùi cuh, ngùi pu ci gùi-àm na k’pu gùi khai hlü. A cun-ung vah ka ngùi cuh, a hei mah-ah, ka gah hnging khai hlü. Cun-ah kia hleih ngùi talent mat, ani-ah kut-ung-kah lák bà pe neh talent ghà om ci-àm pe vä. A i-ah kia hleih ci ung gah ci-ah k’chàng-phung cuh, gah pí neh ng’büh ng’mãng lo khai. Kä gah ci-ah k’chàng-ung-kah, a gah hlok-ah kia ci hngo lák bà-ah kia khai. Cun-ah i-ah kä màwng ci-ah phàn-ah k’chàng a k’pung-ah a k’hmüpnák-ah va ghot vä. Cun zah-ah kiahnák hà ’kiüt-nák om khai,” ci neh piéin ci.

Leave a Reply

Your email address will not be published. Required fields are marked *