K’Chò Khò K’hmòi gui ah mòòng

K’Chò Khò ah k’hmò gui cuh K’Chò pughi pa gui noh m’htéi man ci gui. Ngami noh ami mhtei ah nì lam cuh lüng neh ami m’htei ah kä kya ci. A i hngo kcha ami mhtei ang ci ung khò ami vók lo ung longyung ah chüt hleih phleng neh kä vo ci gui. Khmoi k’eng kpat ah om ciah ghemghang gui cuh kho a ä lo ung ngtäi neh kä hteit en khai ah lah kä ngmin kchu en vai ah shing ngyung gui noh mdek k’keng ami mhtek vai phäh ah kya ci.Cun bäng ah kä kya neh acun yi hngei neh ghing om ciah kphyu kkha kkhihla gui ka vai ah phäh ah phih kya ci.
Cun tu pang ah phih tuhchü cuh khmoiyung ung phung ghíng ciah longshing ktai gui cuh ktung kpe ah át laih laih u hleih a ng’min nak gui da lo ci.
Ca kä ngthei tu man ciah mi pughi pa gui hngo noh longyung ghemghang a i ah mhtei vai hmat neh pyang tham u chütah ca mi hmat lo yop ciah tuhkbäih KCho KChang gui noh a i phih kä ngahtüh a pi gah-tang vai düt teng neh mi plohkheih gui cuh mi teng ah akya ung a nghtei ah thüi vai ah kya ci.
Cun bäng ah kä kya neh mghó mshih sei gui mi mang ah phäh mdek gui dän lo ne mghongtui gui noh kchok lo hleih khmoi gui kä om nak man ung khmoi gui om lo neh a om nak pyi gui phih sei gui ah m’äm gui noh mdek phloh tu khap chütah ngmin kchu ghemghang lo pi hti ci.
Cun gui cuh a u noh botah leng neh a pyein hlak vai ah khin lo ci.

Acun ah tui ung thüh ciah a. m’äm gui ei ok ci gui cuh phih nat nak a hlü hlü gah hnging ciah kya ci.
A cun ah plohkheih nak gui nong vai ah ph’h kya netah a i hngo kcha ah mhtei khap vai gui cun phih mi ngah-tüh khai ah kya lo ci.
Avai hlü ah ngmin khai gui phih ghung mhtek neh kchang gui ah ei mang vai phih kya ciah vok gui gui am phih mbei neh gah ah kba gui a ghemghang nak gui ung mi geit hnging ah akya ung avan ka vai ah nghloi khai kya ci.
Di pyi ci gui phih ni ba khai mi bi vai lah avan ka vai ah nghloi khai a khotüi gui mi mhtei vai ah khin lo ci.