Shingghàm m’dinak ah phäh ah bùi vai gui.

K’Chò Khò ah shingghàm mi m’dí nak gui a hlü hlü om ci.Acun gui ung kah mà kbäih neh mi hmat vai cuh khò vo neh lo kyang neh mi biloh a phäh ah kya ci.Kho kä vok ung a i kä ei vai ciah avan noh ngah-tüh neh mi bi laih laih cuh càng ci ang kä cang ci ang mi ngah-tüh vai hlü lo ca kya ci.
Ca kä ngthei ca cá ng’vái gui hngo noh a i hngo k’cha khò vok vai hmat ci gui ah kya ci.
A i hngo k’cha ami hmat ciah akya ung hngu ma mtumcoih neh ngah-tüh nak on ni kshe mcha neh ami hnguh hmat ah kya ci.
Ngami noh ami pughi pa ah biloh mtheimthang gui cuh akni ah läk ci gui ah kya ci.Khotui kho k’a cuh shingghàm gui noh vah do ci.
Aktung pi ah khogui kho mhtung shingghing khogham gui noh vah la ci ci u neh kho ami vok ung apui khogui gui kplut neh kä vok ci gui.Long yung kpem ghang gui phih phleng neh kä vo ci gui.
Acun ah phäh ah khotui kho k’a ni hleih ami geitko gui phih ngläh ng’an neh avui Pai phih tuitak hleih mhlep mkhoi man ci gui ah kya ci.
Tuhchü cuh hnguh hmat nak a hlü hlü ngthei neh mi hmat lo ci gui noh cá a i phih kä ngtheingthang ci gui noh ami hnguh hmat biloh gui kä mi kphâ ca kya ci.Kho mi vok ung a lu pui kplut neh vo neh long yung gui phih phleng neh vo ci gui.Acun ah phäh ah khotui kho k’a kä ni ba neh kho ahlühlü ah a nglih a nglat ah kya lo hleih geitko phih kä ni neh kä ngläh ng’an ba neh akni ah kä vui pai ba hleih kä nghlep ngkhoi lo ba ca kya ci.
Cun kon ah geitko bäng ah kä kya neh kchang gui ah ók vai hngo ken lo ca kya ci.Ayan phopho hleih tûi ami mhloih man ah longtui gui cuh kíkí hta düt neh nghloi lo ba ci.Pigo kchang gui cuh tui chà yah ung kä ngkyüh lo ba ci gui.Tui a ken lo cuh ghinhlei nak vai mkyih mkyok lo ca kya ci.
K’chàng bäng ah kä kya neh ahei ahngun kghìng gui avan cun phih ami ghin om nak vai mkyih mkyok lo ci.
Cun kon ah tuhchü ghing ghàm gui mdinak akka pi om lo ca kya ci.Chain saw gui on kpe akda ashängshäng ah nak om lo hleih shing a nggho nu gui maih lo ci.Long shing ktai nu gui phih chu tonton neh ami ah lo yop ah kya ci.Acun cuh tui akda pi mi mket ah kya lo ci.Shingghing kdäm tumat noh tui kalan 50 kpang ci ciah akhotui mòòng hnguh hmat kchang gui noh ami pyéin cuh ngah-tüh ah akya ung akya ah ngvang nak vai ah kya ci.
Acun ah shingghàm gui mi m’dí ah phäh ah mi bùi lo vai ah Alnino Khò ngling ah mòòng lo khai ah gukthen nak ah mòòng ung mi teng ba khai.