Thushìng ghoh-thà lah akhòtüi pèingléng
A khòtüî pèingléng a thûshhînnak lah ùh-tuh khòtüî ah ngthongnakPèinglèng thûshînnak,ploh-htahnak,ghoh thànak mi bi mòòng gui20. Hngéit-pèi a shémshâinak amshah cuh kchàng gui ah ghinlù ung bùichúm htî ah kya ci. Hngéitpèi khókkhì a thûshîn ah phäh ah aktúng ah akdú gui ah phäh ah gáigong mòòng ploh-kheih nak ahlühlü akdá hnguh ah kya neh akhmó hta gui phih käp akdá shih hleih hnguh ah kya ci. Avaihü ah pyéin ung kchàng gui cuh shôn kcihnak ung phih kyai, ihkhàt a oh vai bi ah cíngcì gui ah phäh ah kkhítûi a uih gui ung ka noh lo ca mêi kkhú akdá mghüp ung ka noh gáinak kthá kèn hlak ci. Kchàng päng no a bùì ah hngéitpèi a thûshîn pyéin ah a kya ung hteh-htôn nak ung mang ah motor yîn gui lah cíngcì im gui ung ka noh lut lo ca mêikkhú gui, mdekkshîn kkyòng ah thüh neh lut ca tátùh khoh gui, lèilôi ca tûi gui kshîn gui lah mkyüt mshih sèi a hlühlü gui ah kya ci.
Hlùmmlèi mòòng khohmah gui bä hlak ca “Nìpyinnya” amshah cuh akhòtüî hngéitpèi ah a nggóngài avan gählei hnging ca tumat bäng ah kya ca nì lam mdáng pyéin u hleih phih akcàng ah cun gui cuh a nggónggài nak gui ah chà tu hngá ca a ngshünngphan nak kä hnguh neh a khngät khngät a nggó nggài tumat a maih vai mangcâ ah nì lam cuh ahêi a ngngó nggài akthài gui om lo hlak ci düt ah vah nglat ci. 21. Cíngcì im ung ka noh ghoh thà gui,akthushìng gui ung hnguh ah a m’äm ah kya hlak ci gui akghìng gui ah phäh ah kyih kshé ci gui cun phih ngah-tüh vai kya ci.A kum tä hleih ci vai ah cíngcì im ung ka noh ghoh-thà gui,akthû kshîn gui a hngùn kghíng gui mkihmkyok ci gui cun phih ngah-tüh vai kya ci.Cíngcì im ung ka noh ami ghoh thà gui tan täm kkhak om hlak neh cun gui cuh akdá pí ah a hngùn khngìng gui ah phäh ah bänak kä bòi neh a m’äm akkhak bòi neh kyihkyok nak dá ca tat pyang gui bòi ci.
Cun gui cuh cíngcì im gui,bikbî im gui,hlùmmlèi bi nak gui,cohngphlài binak gui,im kphyìm phyéitnak gui,seì im seì péit khat gui,mëi lah electronic binak gui lah cíngcì im gui ung ka no ghoh thà gui ah kya ci.Mi omnak ah khòmdek cuh ashô lo ah ci ah bìkbôi mhtûngnú on täng lo ci.Khòmdek avan ung ayân kyómhtáng neh teng kphya ci gui cuh bìkbôi mhtüng gui ah a kya ah phäh ah a ghí gui ami ngná hló ci.Cíngcì im ung ka no ghoh-thà gui,maanggó kdäm gui lah géitkò nak gui ung mang ah tátuh khoh gui ung ka noh lut lo ca a m’äm gui cuh ngdükhò kchàng gui ah púmkyä gui ung thüh neh gok ci gui.A shängshäng ah pyéin vai ah kcháng gui ah gáigong mòòng kuh màn neh kä gah hnging ah chüt hleih màmòòng na ci gui cuh kham neh hüngnak,ponghtêi ngpyân ngthàm nak gui kä om ciah hnguh hnging ah kya ci.Kchòkhò ung phih hohòi ka boh gok lo ca bìkbòi gui mkhih nak,ghoh thà nak ung ka gui no kchò kchàng ngdükhò kchàng gui a mkyihmkyok lo cuh hmat neh mi mthông mhlah vai khîn lo ci.
