Vatican lah Honduras kho goi-ah ng’lah yum ääp nak hla tha nak lah Catholic yumtu ng’bum noh amät-ah kho uk nak gui-awn ng’pak hleih yum ät nak
Octorber- 23.2026
Vatican news noh am’dang lo-ah ci-ah Holy See-ah a kho hngei-ah m’düih chang won kyi Cadinal Pietro Parolin lah Honduras Shanpubawi Nasry Juan Asfura Zablah ni cuh kho kum 2026, October 22-ung Vatican-ung Om ca Apostolic mang im-ung yum ät nak tumat cuh gu then ci goi.
Cun-ah tum ät nak-ung ma mong (25) ng’dawn neh ng ani-ah ng’lak-ung om püi ca ni ca ng’khawt ng’gei nak cuh ani lo pi hti vai, Catholic yumtu ng’bum-ah upatei-ah ci-ah a om nak cuh do neh ghun m’htei piet vai, yumtu ng’bum lah ghun kho goi-ah vum vai neh bi loh nak-ung ka noh Honduras kho k’chang gui nib ä nak, ng’mü m’cha lam täng, kho k’chang gui-ah ng’khot ng’gei nak lah thum gui cuh m’hlüng hnging vai-ah bü neh bi ci gui.
Cun-ah yum ät nak-ung, a k’tung pi-ah yum äp nak ung hla tha nak, hla tha hleih m’shum m’chuk hnging nak, yumtu ng’bum-ah ma mong gui cuh hla tha hleih bi loh nak hnging gui cuh k’tun na ci gui. Cun cuh Vatican a (2) nak kongsi-ah 1965 kum yum äp nak-ung hla tha nak vai ng’thu shä nak Dignitatis Humanae-awn phih a ng’gui vai-ah büi ci gui-ah kia ci.
Cun kon-ah Honduras kho noh Catholic yumtu ng’bum-am amät-ah lam-ah ci-ah ma mong gui abi loh vai, amät-ah kho amät noh a uk vai ni,yum äp nak-ung bi lo ci gui phih amät noh ghü ceing neh abi loh vai gui cun phih yum ät ci goi. Mät-ah yum nak-ah ci-ah má nak gui cun phih (conscientious objection) lah ng’bä nak gui-awn ng’pak ca mong gui cuh phih a ghun peit vai gui cuh ng’dawn ci.
Vang täng-ah phih yumtu ng’bum-ah m’thei m’thang nak kho k’chang gui gung tu nak-ah ng’bum gui k’bum tu hnging vai, m’thei m’thang nak lah gai gong nak gui m’htei m’hta nak thong k’kyum gui-ah ng’müm m’cha ka vai m’htei nak peit vai gui ami ap vai cun phih yum ät ci gui. Netah ga k’kaap gui lah ye ng’bum gui phih yumtu ng’bum-ah m’htei m’hta nak gui cuh mi gah tu hnging vai gui phih ng’dawn ci.
Cuntu lang pang-ah phih yumät nak ami guk then vai lah leng neh a hngun ghüng lo khai-ah kä kia pha ci. Kho goi-ah ng’lak-ung bi loh nak upatei gui-awn k’chü khän nak gui bi ba neh m’gong k’bäi nak ca gui ami ng’do ng’peit lo ba kon-ah lei cun-ah yum ät nak gui cuh a hngun ghüng lo khai-ah kia ci.
Cun-ah guk then nak-ung kho goi-ung kah m’düih k’chang gui cuh Honduras kho-ah kho k’chang gui-ah ng’yäk ng’chang nak, thum mong gui-ung Catholic yumtu ng’bum-ah gung tu nak gui bäng-ah kä kia hleih kho k’kyong-ung akho hngei gui-awn ng’coih nak tu vai-ah mong gui phih ng’ge ci gui-ah kia ci.
