Catechist Poi bi ci gui

St. Luke-ah poi cuh tamah saya gui-ah poi-ah kia hleih k’shet Parish, Lai long thui im ng’bum, Hngam Bung bi goSt.Michale yum tu ng’bum im-ung October k’cha a (17) k’hngüp-ung bi ci gui nei. cun-ah poi-ung Tamah saya gui ka vai ma mong mah-ah kia ca Fr.Joseph Se Yom lah Parish k’taigü bawi Fr. Aloysisous Naing Shwe ni noh khong mang neh bi ci gui.

Cun-ah poi-ung k’shet parish-ung kah tamah saya gui ng’bum lo u neh miksa gän ap nak gui phih yumtu k’chang gui-awn atäng-ah bi ghom u neh k’taigü ci gui nei.

Cun-ung tamah saya gui-ah ma mong mah-ah kia ca Fr. Joseph Se Yom noh yumtu ng’bum a yat lo pi hti vai-ah yumtu k’chang tumat hti-ung ma mong om ca akia-ah mong ni, yumtu ng’bum a däm lo pi hti vai cuh tamah saya bäng-ung ma mong kä om neh yumtu k’chang tumat phäh phäh-ung ma mong om ca akia-ah mong gui phih pyein ci. Netah k’chu cei mah lo khai gui noh phih ami k’chu cei mah nak vai cuh ng’ngaih na neh ami om vai lah yum nak-ung ami khän tu ge vai-ah a mong ni gui cuh pyein ci.

Mi yum tu nak cun phih mi ng’tüi lo-ung k’chang-ah mi kia lo tu-ung leng neh k’chang-ah bi loh ma mong gui cuh mi ng’thei neh mi hmat ci. Cun-ah hmat gui cuh läk neh mi bi vai hlü ci. Cun-ah hlo-ah yumtu k’chang-ah mi kia lo-ung phih mi bi vai-ah ma mong gui cuh mi ng’thei tu neh mi hamt neh mi läk tu vai hlü ca a mong gui cuh m’thei m’kan nak bi ci gui.

Tamah saya gui cuh kyen lo pi hti u hleih ngami gui cuh k’tha pe tu gui neh, ngami-ah ami bi loh gui cun phih ng’thei ng’tham tu u neh, ngami-ah hngün phih thong hnging ca k’hmo k’tho hta gui cuh ak’da hlü ca mong gui cun phih k’hnga k’phlang gui ci.