K’Chò Khó a kkòtüî lah géitkò mòòng
K’Chò Khò cuh ng’phlän pyi ca kum phya yah ung avan ung ghàm bé neh om man ci. Acun ah khò gham ghong ah akya ah phäh ah khotui kho k’â phih ni neh kho nglei phih ni hleih geit phih kholo ci phung noh akya ah m’hlep mkhoi man ci gui.
Cun tu láng pang ah phih ng’phlän pyi ca kum 50 ung lèng neh kchang gui cuh da lo pi hti neh kho vo neh lo kyang neh bi cuh avan noh ng’ngaih ah kä ng’kyüh ngyah lo ba ci gui.
A kdá noh ami vok lo ah kya neh kho kä gham lo ba neh kpu lo yop netah nglei mdek phih kä ni lo ba neh akni ah kä ngläh ng’an kä vui pai hngin cèi lo ba hleih mhlep mkhoi neh khäm tong nak kä om lo ba ci.
A cun ah kya lo chütah a mshah noh kchei pai ahlühlü shui neh yoi tu neh ngui ghui shui lo ci gui. Ami pei ah bung hngu ung om ca kchei pai gui maih lo hleih thui gham yung ah hteit neh ng’cuh na ng’gang en neh shuilei lo ci gui.
A khngu ah ghingnu ghampa gui ung phung ghing ca kcheipai gui chu ton ton neh sui lo u hleih thui gham gui ngnü kpu lo neh tui gui kyêim lo ci.
Khotui kho k’a phih kä ni ba ne kho phih ngling lo pihti ca kya ci. Akni ah ktäih neh hngu hmat ci gui noh ami pyein nak ung kcheipai gui cuh kho kkhi ung om ca kä ni ca akhu gui akthu shin gui mtheing mhtaih ci gui ci neh ami pyein gui cuh teng ah akya ung K’Chò Khò ung ayan kah on kä täng ca goige nak gui a om lo cuh ngngaih nak vai ah kya lo ci.
Acun ah nglak ung 2005 yah Htum K’Cho Kho pum ah kpui hlo lo neh geitko gui mdi lo yop hleih ei ok vai gui ngcet lo chütah a hoi phih kä hteh ah kä dong khton nghloh nghngih neh om man ca Kanpetlet lah Mindat ung om man ci gui cuh Malaysia ah hteit neh nghloh nghngih lo ci gui.
Acun ah akda dong neh ami nghloh nghngih nak kum gha hlok sho lo chütah bung yung ah a bü ah tak ca mtà (ဝဥ) gui man lo hleih acun gui co neh yoi tu lo ba ci gui.
Ngui apí kchu tha ci gui cuh mta gui k’hleih u neh ami mät noh geit neh yoi tu lo ci gui. Akhngu ah avan noh mta geit lo neh acun bäng bäng ami bi lo ah phäh ah a khótüi peingléng ah phäh ah kä nghloi ci gui om lo ba ci.
Acun ah kä nghloi ci gui läi cuh mta cuh geit nak laih laih ung geit ung kshin mdek le gui ken lo pi hti neh kä ni lo ba ci. Acun laih laih ung kum kko gha geit ung akni ah kä tak lo ba ci.
Cun kon ah avan düt ung mta abe ung kho ngling na pi ci ciah a mshah gui noh ami pyein phih om lo ci.
Acu gui ah a khotüi peingleng ah phäh ah kä nghloi ci gui mthong mhlah hnging vai phäh ah kum ksho ei mang hnging vai ah géitko vai ah K’Chò Khò pigo mshah ung ponghtei nak gui om ci.
Acun ah a ksho ghing neh ngtheih pai hleih yoi tu neh ei mang hnging nak gui ung kah leng neh ami geit lo cuh Coffee ah kya ci.
Cun ung amshah noh thopat, lingmaw, laphet gui phih geit ci gui.
Cun ung ghunkho uk ci lam täng ah ka gui noh tängpang neh pigo yung ah chüt hleih ami thählà läi cuh Coffee tumat bäng ah vah kya pha ci.
A kkhan ah a mong lam gui cuh teng ah akya ung tumat bi shüm neh kä kya lo ba hleih tumat ah ngplon ba laih laih cuh hnguh hmat ngah-tŭh a kèn cuh ngdang ca kya ci.
A hei biloh gui lah hnguh hmat gui ahlŭ hlü on mi ghin om tu hnging vai ktha nak vai cuh hlü ba ca kya ci.
Amshah noh a ghunkho hei ung ka gui ah hlo ah pyinnya ahlü-hlü shui hleih amshah noh akthai ah biloh gui, vuh mhtah gui, geitko gui mi bi hnging vai hlü lo ca kya ci.
Tumat noh a bi bä ca ngngai netah avan noh läk neh bi tu ah kä kya en neh
mät ah om nak on nghloi ngpan neh a khotüi ah phäh ah phih plohkheih nak kèn pi ca lam on ghin om hnging vai ah om cuh
K’Khanpughi noh nu pa khtük a tüi yah ung a pyein ah khòmdek mhtei vai a pyein cuh ngngai neh läk ah kya ci.
