K’hmo K’tho Gui-ah K’hngüp Täi Hngün Thoh Nak
K’hmo gui cuh ami ng’hlän lo-ung K’kyong khui-ung ka noh ng’pai lo khai gui-ah kä kia neh ngami cuh nu pa gui-awn atäng-ah ng’vai lo u neh ami m’chüt bi tu ät neh ami ng’kyäng lo vai hlü ci.
K’hmo k’tho tumat cuh amät ng’hla tha neh a ng’vai loo vai cuh a ng’ghüt-ah kä kia neh kyäp kyäp-ah a ng’vai lo pü vai hlü ci. K’kyong khui-ung lam m’shüm nak kä om hleih amät cuh kä ng’düi tho hnging khai. Im k’kyong khui cuh u pa ca kia ci. Hlü-ah phih hlü ca kia ci. Cunte k’hmo hta vai hlü-ah ng’hta ng’ko püi om püi cuh kä m’hngi ci. A i phih m’chüt hnging ci-ah ng’ngai yah ci-ah kia ci. A i phih m’chüt hnging ci phih om hngo khai cung phih nu pa noh a nong vai chin-ah kä kia pha ci.
Shin-ah kho kum nak ci gui cuh ami ng’pong nak gui-awn di dam ci phih om ca kia ci. Shui lei neh k’tä k’chät ci gui noh ami teih püi gui-ah kä ni ca k’khuih lim nak gui phih om hnging ci ci neh hnguh ci gui-ah kia ci. Ei awk nak gui, gumtha shei gui lah van-ah kä yum vai-ah om ip ng’hta ng’ko neh phih kia lo hnging ci. Nu pa gui mät noh m’hngi nak yei nak-awn m’caw m’thei vai hlü ci. Nu pa ge noh ayet awk kä ni ci. Hle hlak kä bä ci ci neh m’thei neh tah amät ge a caw akia-ung k’hmo noh kä läk hnging khai. Ka bi-ah hlo-ah kä bi neh ka pyein-ah na bi vai ci-ung kä gah vai. Nu pa ge noh bi lah pyein kä ng’gui-ung ak’hmo gui noh kei-ah kia hleih ak’ni-ah ka om vai pyein neh amät ge ca om ci ci neh ani phih akia hlü-ah kia khai.
Nu pa goi ani nik k’hngih bi bik ci gui-ah k’kyong khui-ung im k’kyong üp htak hleih vun neh ei awk ghawn neh bi lo ät neh ami kia vai cuh kä ng’hloi ci-ah kia ci. I-ah kia-ung phih atäng-ah ei neh atäng-ah vum vai neh bi lo neh kong ät hnging vai-ah k’tha nak vai. Van noh vun neh bi hnging vai-ah ei awk gui vun neh bi neh ei awk vai. K’hmo tumat bäng-awn atäng-ah om püi hnging vai-ah k’tha nak vai. A hngei k’kyong khui k’chang gui kä om hleih amät bäng ng’hta püi neh ang’hta phih ng’ngaih peit vai.
