Grenobel Mânggo ung ka Bä ciah Hugh ah ghünlu a mong
Bä ciah Hugh cu Pyinhtit ghunkho Grenobel Mânggo ah Taigü Mâng ah kya ciah Bä ciah Hugh cu k’taigü nak lah peitak nak ung ghui ung k’tha na ne kya ciah k’kyawng khui ung ka no ng’vai lo ciah kya ci. A k’hmo yah ung tün ne ng’müi m’cha lam a k’ni ah k’tha na ciah kya ci. K’chang gui ah k’khan ah a k’cum ah a m’lung m’yo m’nem ne hla yang ne ng’hta ng’ko ciah kya ci. A k’ni ah hnguh hmat nak ung khäh ghah ne kä kya tu ciah kya ci. Hugh cu a kho kum 25 ung Grenoble mânggo ah Taigü Mâng tumat ah kya lo ci. A ni cu Taigü Boi gui a mi bü ah a mi om k’ih gui a k’ni ah a pyantham ba peit gui cu khokum goi hlok ung k’tha na ciah kya ci. A k’hngu ah a ni ah hlüngtai nak ung a bi loh vai gui a k’ni ah kä bi hnging ciah ng’ngai lo ne a hlüngtai nak ah Taigü Mâng ung ka no ng’düm ciah kya ci. K’chang a k’da no a ni Taigü Mâng ah a kya lo ah phäh ah ng’phät nak gui a k’da om lo ciah ah hnguh tu lang pang u hleih phih a ni ah kä ng’päng hnging ah bi loh nak gui bäng ng’ngahtüh ne a m’lung ng’kya lo hleih Taigü Mâng ung ka no ng’düm ne Yahteih tumat düt ah kya ba ciah kya ci.
A cun ung ka no Yahteih kyawng ah a shäng hta om ba pha hleih a ni ah ng’vai hta gui no Grenobel ah hteit ba ne Khong mang ne a bi loh ba vai ah k’nga k’phang u hleih a cun ah bi ba ciah kya ci. Hugh cu a ng’täih ah yumtu k’chang gui awn a k’ni ah ng’hta ng’ko ne ng’gei ne om ciah kya ci. Yahteih kyawng ung om ci gui ah Yahteih gui ah hteit ne om tu ne ng’müi m’cha lam a ng’phät nak vai a k’ni ah ng’hta ng’ko püi gui ne ta mä m’lung m’yo m’nem nak awn k’tha na ne bi bi ciah kya ci. A ni cu k’chang gui ah li ah Khanpughi ah mong lam thähla m’thei m’thang nak ung a kya ah ghui ne k’chang gui ah ghünlu lah m’lung k’nga a ng’thong hlah vai ah a bi loh gui cu awng tang ciah kya ci. A ni cu k’chang gui ah hteh hton nak hnging vai ah k’hlei gui pyang tham ne, goipyam ci gui ka vai sei yung gui coh pe gui ne, lai bi k’chang gui ka vai a mi yoih tuk a ng’hloi vai ah phih ci pe gui ciah kya ci. K’chang gui ah ng’müi m’chang bäng ah kä kya hleih kho m’dek lam kyä hla lam ah phih a mi ng’phät hnging vai ah bi bi ciah kya ci. A ni cu a k’hngu ah Yahtieh kyawng ung a khan hta tumat ung k’shoh khai ne Taigü ne düm hta om ne ta Plague yoka awn shih ciah kya ci.
