Bä ciah Louise de Marillac ah ghünlu a mong
Bä ciah Louise de Marillac cu Pyinhtit kho ah ng’tüi ne ta hlûktui k’o ah a kya yah ge ung a nu no a shih ta ah kya hleih a pa no a m’htei ah kya ci. A hmo yah ung a pa no im ah ca a m’thei ah kya ci. A khokum 15 be lo hleih a pa cun phih shih ba ciah kya ci. A ni ah thüihlei nak awn be ciah a ghünlu a m’chüt näng hnging vai ah Shangpinu ah k’kâ ah bi bi ciah Antony Le Gras awn letthat ne om ci goi ah kya ci. Ngani ah k’kyawng khui cu dìmgei ne yeikyai nak awn be ciah k’kyawng khui ah pyangtham hnging ni ne a ni hta k’pa tumat gah ci goi ah kya ci. A cun ung ka no Antony Le Gras cu a k’ten ah goi lo ne shi ciah kya ci. Louise de Marillac cu a k’hmo k’chang ah kya ne mei nu tuamat ah ng’lat ciah kya ci. Chrsitu kum 1623 ung Louise cu a ni ah ng’müi m’cha lam ung khong mang pe khai ah Vinsent de Paul (Sep 27) a do cu ng’müi m’cha gui a k’dâ ah ni nak vai ah kya lo ci. Vincent cu k’chang gui gunhtot nak vai ah a ng’bum im gui coh nak ung khong mang ne bi ciah kya ci. Louise cu k’kyawng khui kä khoi ein ba ne ka gai ci gui m’htei ne om khai ah a m’lung phukpit ne leng ne bi bi ciah kya ci. Duyai ci gui m’htei m’hta ne a gong htot nak ung bi bi khai ah k’hngumi hta gui ng’bum tumat cu m’düih hnging ciah kya ci.
Ngami gui cu a mi mät no a mi mät k’chü m’gein nak ah hta k’hngumi gui ( Daugthers of Charity) ci ne chü ci gui ah kya ci. Vincent no ngami gui cu a k’pung ah ka k’hngumi ng’htoi ah va a do gui ah kya hleih a mi hluihlak gui phih a k’pung ka gui no a mi hlui ah hlo ah va hlui hlak ci gui ah kya ci. Louise no ngami am a pyein cu nang mi ah Mamah kyawng cu duyai k’chang gui ah seiyung ah kya khai. Nang mi ah om nak ah a khan cu k’khah ah kya ne nang mi no na mi k’taigü nak ah chaple cu taigü kho ah phaya kyawng ah kya khai. Nang mi no na mi kham ah ng’vong cu na mi ng’ngaih nak, nang mi ah m’kat m’shi k’tung hta gui cu Khanpughi na mi kyüh â tu nak, nang mi no na mi ng’bün ah lu vum nak cu htitheing ciah na mi om k’ih gui ah kya ci. A k’cang ah k’chü m’gein nak ung bi bi ciah hta k’hngu gui ( Dauters of Charity) cu k’cham or ng’vong ah k’kyong ah kä kya hleih a k’pung ah om ne bi bi ciah yum nak lam ung a ng’htoi ah kya ci. Ngami gui ah bü ceng nak cu duyai ci gui gunghtot ne m’htei m’hta gui khai ah kya ci. A cun ah a mi bi nak ung duyai k’chang gui ah om nak ah hteit ne gunghtot gui ne, a mi ghoh düt ah a k’hmo hta gui m’htei ne, k’kyong khui ung ghat ghum ne ng’genam nak gui m’cäi m’ä gui ne kya ci gui ah kya ci.
Ngami gui cu a í ka om hleih dupyam ci gui ah hmai ung Boi Yesu shui ne a mi hnguh vai ah kya ci. gunghtot vai ah hlü ciah k’chang gui no ngami a mi k’taigü yah ung htei ne hmong cang gui cun phih kä m’lung k’she ein ne a ge ah a mi gunghtot tu gui hnging vai ah om ci gui ah kya ci. A mi k’taigü nak nong ne duyai ci gui ah htei ne ngami gui ung hlü ci gui a mi gunghtot cu Khanpughi ung ka no Khanpughi ah a mi hteh ah kya ci. Daughters of Charity ng’htoi un glut tu ciah k’hngumi hta gui cu a k’dâ ah kya lo ci Louise de Marillac cu k’chang gui ah m’lung k’nga ung a k’ni lam ah a kya ah bi lo hlü ciah a kya lo vai ah ci thei ciah khongmang k’chang tumat ah kya hleih k’chang gui no a kya ah a mi m’nai tu ah kya ci. A ni cu Christu kum 1660 ung shi ciah kya ci.
