Akhòtüî lah akdú angmang gui
Dú khaih ci gui ah a nggó nggài gä hlêi neh khòmdek mthong mhlat neh ni tu ba ca hngün tumat ah pyânthàm vai nggèngshòi vai ah hngün ung ashah noh akhmó kä ngtüì khai ah sèi mang câ u neh kchàng ah pùng khéi htà nà nak shûm vén vai ah ami khnàgà kphlàng nak gui om ci.A khngät ghunkhò hei gui noh däm ngphät kshùng ca ghunkhò gui gungkûm mòòng péit nak ung htana ngkhêi htung kbäì péit vai mkot lam policy gui on khit khón neh ghunkhò päng nghtòi gui noh kcét neh ami bi hlak gui cuh mi bùi ci. Kchàng ngkhêi htung gui dá neh mang ca hnging ah khoh tang a kên lo ung däm ngphät hlüng tài nak lah khoh-tang gui ngkyüm bé hleih mang hnging vai a ngcét ah mòòng ami pyéin cuh khîn ci hlok ah kya ci te cuh kchàng gui ah däm ngphät hlüng tài nak lah a k’om kbät ah khoh-tang gui cuh tumat lah tumat mät hngá ngngài neh akní ah ak’hläk kkhäm ah htung mang ah nì lam gui a däm tài lo ung kchàng ngkhêi htung adà lo ung phih akní ah màmòòng nak hnging vai ah mòòng mi hmat lo khai.Kchàng amshah gui cuh khoh-tang ngùi ghùi gui kchàng apí tu ba ah akshé akchün ah ami mang nak kä mkat en u neh kchàng ngkhêi htung adá lo ah mkat cuh a nggó nggài gä-hlêi vai cuh kä yùm ah pyéin neh gah ah kya ci.
Shin ah nì lam ung kchàng avan ka vai khoh-tang gui atängtäng ah mang nak cuh kä kya hning ciah mòòng cun cuh kchàng kkên tu ba ah nghtòi gui ah goh mkot ah akya ah mòòng,kchàng gui noh khoh-tang ami mang lo ung khòh mdek ung kä yu khai ah nghlút neh pyéin ci gui.Cun kòn ah mi hmat ah täng ah kchàng gui ah phäh ah gah hnging ah êi ók gui ah ngbûm kthùm ung ngbûm ät cuh kchàng gui noh ghot u neh ami êi vai kä om ca akdú gui ka vai ah phäh ah acun ah ghoh cuh akdú gui ah êi ók vai guh tep gui ah kya ci. A ngdäih ah pyéin ung ghunkhò kkyòng lah a khòmdek púm ah kchàng ah gùi dá kä tàgá nak cuh mi kshíng ci.Kchàng adá lo ah phäh ah ngdü hngün tumat ung khoh-tang mangcâ nak aktén ah akâi lo ung ngdü hngün ung amòòng alam gui nggó ngài hlak ci. A ngtói gé ah akhòtüì pèingléng a thû shîn nak on mkónmkè mòòng ghoh ghoh ah khoh thêm gui gä hlêi nak,khoh-tang ngùi ghùi akèn cu lo nak lah kchàng ah om ih a düm lo nak gui a ngdün ah mi büí khai kya ci.
