Tui k’phùm Johan a ng’tüi lo vai-ah màwng a piéin lonák.
Judea Sangpùghang Herod nawh a uk zah ung Abijah pa-khúi Zachariah ng’mingnak ci-ah k’tài-gü ng’vái tumat om ci. K’Tài-gü-ah k’chú cuh Aron-ah ng’sòn-ah kia ci. A ng’ming cuh Elizabeth-ah kia ci. Ani ni k’hngih nawh Khãnpùghí-ah m’cäi om ci phung lah, bi vai phung cuh a k’ní-ah läk ni neh Khãnpùghí-ah mà-ah k’chàng k’ní-ah kia ci goi. Ngani cuh, ani htá kä om ci. Elizabeth cuh, sìng ci-ah kia ci. Ani ni k’hngih cuh, ghü lo ci goi.
A mät-a ’kiong khùi nawh abi tu vai-ah kia lo hleih Khãnpùghí ah mà-ah a k’tài-gü zah ung K’Tài-gü gùi-ah ci man ng’tüi-ah, k’chüt-nú m’chih-awn a k’tài-gü vai-ah kia hleih khàw-im ah lut ci. Ani, k’chüt-nú m’chih awn a k’tài-gü zah ung k’chàng avan cuh a k’pung-ah k’tài-gü neh om ci gùi.
Cun zah ung Khãnpùghí-ah Khãn-htapup cuh k’chüt-nú m’chih-awn, k’tài-günák ah k’pat täng-ah ng’düí neh a k’ní ah ng’dáng ci. Zachariah nawh hnguh neh a m’lung cat hleih cäi ci. Khãn-htapup nawh ani-àm a piéin cuh “Zachariah aw, kä kiü èin-ä. A i-ah kia hleih ci ung na k’tài-gü cuh, ng’ngài pi ci. Na’chú Elizabeth cuh, k’pámí-ah htá lo khai. A ng’ming cuh, Johan-ah hlui vai. Nang phih na zèi tu khai. Ani htánák-ah phäh-ah a k’dá cuh, zèi tu khai gùi. A i-ah kia hleih ci ung ani cuh, Báwi-ah mà-ah bä ci-ah k’chàng-ah kia khai. Ca-pit tui lah áwk-tat man phung kä awk khai. Anú-ah poi ’kiong mät-ah Muh Khãnpùghí awn bé khai. Israel gùi ung-kah a k’dá, ami Khãnpùghí-ah hteh bà hlak gùi khai. Pá gùi-ah m’lùng cuh ami htá gùi täng-ah, kä zùm ci gùi cuh ni’ci gùi-ah hnguh hmatnák-ah lam-ah, m’hlat gùi neh Khãnpùghí kavai k’chàng k’ni gùi pian vai-ah, Elijah-ah m’lùng lah, bänák-awn, Báwi-ah mà-ah hteit khai,” ci neh Khãnhtapup nawh piéin ci. Zachariah nawh “Cun cuh a i-ho k’chà-ah kia hnging khai ang? Kei cuh, ka ghü lo ci. Ka k’chú phih ghü lo pi ci,” ci neh Khãnhtapup àm piéin ci. Khãn-htapup nawh m’sàng bà neh a piéin cuh “Kei cuh, Khãnpùghí-ah mà-ah om ci-ah, Gabriel-ah ka kia ci. Nang awn ng’htà neh nang àm sin-ah zèi tu vai, ka ning m’thein vai-ah, kei cuh na tüi lo ci. Nang ng’ngaihnák vai. Kia lo khai-ah, kei-ah k’chü cuh, kä na zùm-ah phäh-ah, cun-ah kä kia pha k’bäit ung nang cuh, kä k’chü thei neh áng neh na om khai.” K’Chàng gùi nawh Zachariah cuh, güng-kio neh ani cuh, khàw im-’kiong-ah a so-ah phäh-ah cäi ci gùi. Cun tu pang-a phih, ngami kä ng’htà bà püi gùi thei hleih khàw im-’kiong ah mik-hnguh ci, ci-ah hmat ci gùi. Ani cun phih, nüt-awn piéin neh áng neh om ci.
A bi vai k’hngüp päng zop hleih im-ah hteit bà ci. Cun-ah k’hngüp gùi cuh, ng’päng lo hleih a k’chú Elizabeth cuh käü mah lo neh k’cha k’hmà púm bé lo hleih a piéin cuh; K’Chàng gùi-ah mà-ah, ka hmai kä thui èin khai-ah, Khãnpùghí nawh na m’htéi neh sin-ah ci ci.’
