K’hmo Hta Gui M’thei Nak

Ng’kyäng lo ci ci gui-ah mi hta k’hmo gui cuh mi mät-ah ng’ngaih-ah mi täk gui-ung ngami-ah ng’ngaih-awn kä täng neh kä ng’hloi onak gui phih da hnging ca kia ci. Caw kia hleih mi m’hting mi m’cäi lo gui-ung ma neh mi na ng’shäm nak gui lah bi chin gui cuh ni m’thein tub a gui hlü nei.

         Vuuk kat nak lah kä ng’hloi nak gui cuh ng’khai hleih pyein vai.

kho kum (10) lah (16) kah ng’lak-ung k’pami hta k’hngumi hta gui-ah m’hngi nak, social media, m’gu m’tha shei, shei, ei awk nak, teih püi gui-ah yo k’ka nak gui phih bui awt lo hnging ci gui-ah kia ci. A caw kia hleih im cuh ng’thu shan nak aom-ung kyüh ng’aa nak kä om-ein hleih nu pa gui-am ng’shi k’ca nak aom hnging vai-ah pyein vai hlü ci.

         Vuuk kat nak lah thüi hlei nak gui ami ma nak hnging vai m’thei gui vai

K’hmo gui-ah ami vuuk nak gui phung cuh nu pa gui noh m’cha m’lang tu peit gui kä kia ci.a k’hngät ka nak gui bi nak-ung ka noh i hlo k’cha ng’düi lo ba hnging vai-ang?i hlo k’cha do thei nak gui cuh gah hnging vai-ang ci neh ak’ni lak nak thei cuh ak’ni pi-ah ng’thei nak-ah kia ci.

        Ngami-ah hla tha nak ang’khap lo cuh m’nai tu püi gui vai.

K’hmo k’tho gui cuh ami mät-ah hngün lah hla tha nak cuh ng’ya lo hlü lo lei lei ci gui-ah kia ci. Caaw kia hleih ami mät-ah kho kum-awn ng’gui hleih hla tha nak cuh peit gui vai hlü ci. Cunte phyaang  gui düt-ah kä kia neh a hlü nak gui-ung m’hting nak gui cn phih bi peit gui vai hlü ci.

       Beit gui vai-ah kä kia neh a täng-ah om püi gui vai.

A täng-ah ei ei püi gui neh , k’pung-ah hteh-ung phih k’hmo mah-ah hteh vai,atäng-ah ng’hta püi gui vai. Nu pa lah hta k’hmo-ah ng’lak ng’khawt nak a da lo lei lei-ung hta k’hmo-am hting ling nak gui nm’thei cun phih ng’hloi lo lei lei ca kia ci.

        Ngami om hlak gui-ah hlo-ah mät ma neh om vai.

K’hmo k’tho gui cuh nu pa noh i-ang apyein ci-ah tah i-ang a bi ci cuh teng tub a ci gui. Ngami gui ng’khai neh, hitng ling neh, ma mong ka na neh, ami m’lung yün thei neh ami kia vai ng’yak hlü-ah akia-ung nu pa ge noh ma neh  cun gui cuh aläk vai hlü ci.

    M’hting nak gui kä bi pha-ung ng’ngaih nak cuh k’hma vai.

K’hmo k’tho tumat noh “ka nu pa noh kei ka she ca na hngu ci. Kat nak gui na k’bün ci” ci neh ang’ngaih-ung cun-ah k’hmo noh vuuk a hnguh nak, athüi nak gui cuh anu pa-am kä m’thein lo tu ba khai. Ka nu pa noh kä na yum-ung phih ka pyein na ng’ngai khai” ci neh ami ng’ngaih lo-ung nu pa lah hta k’hmo-ah ng’lak cuh ng’gei ng’cam nak däm lo pi hti khai.