Bä ciah Cecillia ah ghünlu a mòng
Tum k’khong k’chang gui ghung m’htei gui ciah bä ciah Cecillia cu Roma Mânggo ung k’chang k’bä k’kyang khui gui ung ka no ng’tüi lo ciah kya ci. A ghünlu ng’lami awn a ghünlu pum a gänap ne om khai ah ng’gun ne kya tu lang pang hleih phih a nu lah a pa no k’chang k’bä Valerian awn ling ne a ni letthat hlak ah kya ci. A cun ah hta mi lak nak ah poi mät ung Cecillia cu a mät ngo tu nga ne a m’lung k’kyong ah ka no Khanpughi m’tam ne ng’äi ciah kya ci. A k’hngu ah a ni cu tum k’khon nak ung hnguhmat ne ghuih ci gui ah bä ciah k’chang ah kya lo ci. Cecillia lah Valerian cu a ni im k’kyong ah a ni om yah ung Cecillia no Valerian ah m’lung k’nga ng’thong hlah hlak ne shihla lam ah ng’phep ne a om hnging vai ah ni na hnging ci goi ah kya ci. Valerian cu m’shi nak Sacramentu a lak Khanhtapup tumat Cecillia ah pei ah ng’düi lo ne Hninsi papai lah Hnin Papa awn m’ghuh ne a mi pyan ah luchüm Cecillia ah lu ung a k’bün cu hnguh ciah kya ci.
Cecillia cu a ni ah k’koi ah kya ciah Valarian ah na tiburtius ah a m’lung nga ng’thong hlat khai ah phih ci ciah kya ci. Christu kum 192 ung Commodus no yumtu ng’bum a kalu na ne kya hleih Valerian lah Tiburtius a ni ng’phäi na cu Pagus Triopius ciah Roma mânggo ung ka no a hlat nak ah cang lam ah phäh ah a ni hngun pe ci goi ah kya ci. Ngani a ni shi kä sho pha hleih Cecillia phih a mi pha ah kya ci. Mingyi Almachius ah maa ah a ni ah yum nak cu cang ci ah m’hteng ne pyein hleih a k’hngän ung k’thum vei m’ghuih u ne a mi nong ghüt ah kya ci. Shi hleih a ni ah gôk cu m’dek k’kaa m’cümhngün ung a mi k’ohuh ah kya ci. A k’hngu ah Trastevere ung om ciah St. Cecillia Phaya kyawng ung a mi k’plon ah kya ci. Christu kum 1599 ung a mi k’phih nak ung teng ba u hleih a gôk cu kä thuk ein ne ip hta ci vai hlü düt ah om ciah kya ci.
