Bä ciah Josaphat ah ghünlu a mòng
Yumtu ng’bum a k’ni ah a ät vai ah k’tha na ne bi ciah Bä caih Josaphat cu Christu kum 1580 ung Eukrine ghun khaw Vladimir ung ng’tüi ciah kya ci. Vilna ung om ciah hlumlei k’chang tumat ah om nak ah bi a bi tu yah ung im mah no ngani ah a ni hlumlei nak ung a ni gah a täng ah ng’pai ne a ni lak vai lah a hta k’hngumi tumat phih a k’chu nak vai ah pyein hleih Josaphat cu Yahteih tumat ah kya khai ah a m’lung a phukpit püi ah kya hleih a cun ah k’hngih cu ma ciah kya ci. Christu kum 1604 ung Vilna Mânggo ung om ciah Shing k’thum Khanpughi tumat ng’ming na ciah Yahteih a ng’htoi ung lut tu ne a cun ung ka no kä sho pha hleih Taigü Boi tumat ah kya lo ci. Taigü Boi Josaphat cu lang hta ciah ghünlu, Kyä lam ah ng’phep ghuih ne kyünhloi nak awn om ne ta Ordothox lah Roma Yumtu ng’bum a ni ät ba vai ah k’tha na ne m’thei m’cäi ciah kya ci.
Christu kum 1617 ung Polotsk Mânggo ah Taigü Mâng ah kya lo ne ng’thu k’ni ng’thei nak vai ca uk cu yoih vai ah pyam ciah kya ci. Josaphat cu k’hmät bäng ah kä kya hleih lethtat man ci gui a k’ni lam ah a mi ng’thong hlah ba vai ah pyamtham ba gui khai ah a ng’ngaih phukpit ciah kya ci. A ni ah Khanpuhgi ah mong lam bi loh nak ung a aung tang gui cu Orthodox Taigü Boi gui ka phäh ah a kya ah m’lung k’she vai ah kya ci. Ngami no Josaphat am ng’müi m’cha m’guk ei ci ne chü ci gui ah kya ci. Josaphat no kei cu Roma yumtu ng’bum awn ät vai lah Bä ciah Petru (Papa Shangpughang) ah a kyukakya Aanaa ah k’kaa ah bi bi ne ka m’dang vai ah a ge ah ka om ci ci ne pyein ci. Christu kum 1623 ung khong ngoi k’taigü nak m’cu khai ah phaya kyawng ah a hteh yah ung k’chang ling gui no hlenget awn kap ne a mi ngon ah kya ci.
