Bä ciah Mother Theresa ah ghünlu a mòng

Mothe Theresa cu Christu kum 1910 ung Skopje ung om ciah Balkans ung ng’tüi ciah kya ci. Hmaei Nu ah kya ciah a nu ah m’htei m’hta nak awn ng’vai lo ne Christu kum 1928 ung Ireland khaw ung om ciah ( Thae Sisters of Loreto ) Mamah ng’htoi un glut tu khai ah a imu ng ka no lut lo ciah kya ci. A ni ah ng’ming cu Lixeue Manngo ungka Theresa ah ng’ming lak tu ne Mary Theresa ci ne a ng’hlui ah kya ci. A khho kum 19 gok lo hleih Culkata ung om ciah St. Mary kyawng ung  ca m’thei khai ah hteit ciah kya ci. Chhristu kum 1944 ung a ni ah k’tha nak, a mithei m’thang a nil ah a k’tung pi ah m’hngi nak awn a k’hmo k’chang gui m’htei m’hta gui ne a mät ka vai ah a í kä ng’ngahtüh ein ne a bi nak awn a cun ah kyawng ung kyawng uk tumat ah kya lo ci. Mother Theresa cu khokum m’ku hlok India ghunkhaw ca ng’thei nak ah kyawng ung ca m’thei ne om man ciah kya ci. Albanian pakkhui k’chang ah kya ciah a ni ah nga tu pi ne kya ciah ghünlu cu Christu kum 1948, September k’cha a k’hngüp gha k’hngüp ung leng ciah kya ci. a cun hngüp ung Darjeeling ah a hteih nak ung Khanpughi ah chü cu ng’yak ciah kya ci. A cun ah Khanpughi ah chü a ng’yak ung tün ne a ni ah m’lung k’kyong ah a cun kheng geng ng’ngahtüh lo ciah kya ci.

Khanpughi no a ni cu duyai k’chang gui am a tang ah om ne duyai nak ah ghünlu awn a peit tak vai ng’yak hlü ci ci ne ng’ngai lo ci. A cun ung ka no The missionary of Charity Mamah ng’htoi m’düi ciah kya ci. A cun ah a m’düih ah Mamah ng’htoi cu Papa Shangpughang no a k’bäi vai ah khokum k’goi peng peng a k’äih ah kya ci. Papa Shangpughang no a k’bäi nak a gah lo kon ah Calcuta Mânggo ung om ciah duyai k’chang gui ah om nak ah hteihton ne lembai ci gui ah a k’hmo hta gui ah k’hmaleim gui m’shi peit gui ne, shih lo khai ah kya ci gui ah a ghü pa gui cu a k’ni ah m’htei m’hta gui  ne, a cop kä nib a hleih kya ah ei coi ne yai ciah k’hngumi hta tumat a m’htei m’hta nak awm a ni ah bi loh cu leng ciah kya ci. A cun ah a bi cu a ng’däih ah a bi loh lo ah kya ci. Boi Yesu ah a shi lah a hla a e ikon ah Phaya kyawng k’kyong ung ka no a k’pung ah lut lo ba ne a kut ung citputi k’kot ne k’chang gui no kä mi m’hngi yei nak gui, a mi nong düt gui cu shui lei ne ci ci. K’cha a pi sho lo hleih a ni no ca a m’thei nak gui ah a k’chang k’hmo gui no a ni cu a kya ah gunhtot lo ci gui ah kya ci.

Christu kum 1960 ung Mother Theresa no a ni ah Mamah gui a m’shah cu India ghun khaw ung om ciah a hei Mânggo gui ung tüi gui ci. Khokum 30 lo lo hleih a ni ah bi loh gui cu kho m’dek pum ung yat ne van no a hmat lo ah kya ci. A ni no a pyein cu a k’hngüp täi bi k’täp ah bi loh nak gui ung nga ciah m’hngi nak awn bi vai hlü ci ci ne pyein ci. Mother Theresa cu Christu kum 1979 ung Noble suh gha hleih a cun ung ka no leng ne Media gui no a mi m’dang lo ah a mi hmat lo ah kya ci. Cun tu pang lang ah phih duyai k’chang gui ah ng’lak ah a ni ah m’lung kä ng’thong hlat ein khai ah ci ne a k’ni ah kyom hta ne lang hta ciah m’lung awn a ng’däih ah m’htei m’hta gui ciah kya ci. “Htitheing nak ci cu k’chang a khen ah om düt ne yeikhai nak ah kä kya ci. Nang la kei ah läk vai ah lang hta ciah bi loh vai ah kya ci” ci ne pyein ci. Culkata Mânggo ung a ni gunhtot khai ah lo ci gui am na mät no Mânggo ung hteit htong ne na shui vai, Khanpughi cu a k’hlang ah kä om ci, na pei ah om ci ci ne pyein na gui ci. Mother Theresa cu Christu kum 1997, September k’cha 5 k’hngüp shih hleih a ni ah ah gok cu ghunkho Mâng gui mah ah a mi htüm ah kya ci. A ni ah a gok cu a mät no a m’düih ah ( The Missionary of Charity ) Mamah kyawng ung a mi k’phuh ah kya ci. A ni a mi k’phuh nak ukku ung a hei hei yum ci gui ah k’chang gui no htei ne a mi um nai tu ah kya ci.