Bä ciah Joan of the Cross ah ghünlu a mòng
Bä ciah Joan of the Cross cu Christu kum 1666, June k’cha 18 ung n’tui ciah kya ci. A mi ng’ nu be 12 ung ka a ni cu a k’shui pi ah kya ci. A nu no a yoih tuk nak ah im hta cu Pyinhtit khaw, Anjou ciah Mânggo ung om ciah kya ci. A cun ah im hta cu a ni no a mawi ah a gah ah kya ci. A cun ah saing hta ung yum nak lam ung mang vai gui ah ng’kho lah ei ok nak vai ah ng’ko hta gui cu a yoih ah kya hleih a ni no a gah tang ah ngui cu a nu a m’ei nak vai hngo düt ah kä ng’chu ng’pha ciah kya ci. A cun ah duyai nak no a ni am ngui ghui a kya ah ng’yak hlü ci ah a m’lung k’nga ng’thonhlah lo hlak ci. A cun ah kya hleih a dängdäih ah bi bi ne a yoih tuk gui cun phih a k’hngüp täi hleih yoi lo ciah kya ci. A om nak ah Kuu Phaya kyawng hta ung lo tu ci gui am a í phih kä ng’kyüm ciah a khan hta tumat cu k’khah tu gui ci.
Ng’yoi ne ei ci gui a ni ah hteit ne kä mi ng’k’yoih ein vai ah a im k’kyong ah ei ok vai ah ng’kho a í phih kä tha ci. A ni ah ng’büh ng’mang nak vai ah lam cu kä om ciah kya hleih a yoih tuk nak ung a gah ah ngui gui cu a van m’cun khai ah a m’lung phukpit ne k’tha na ne bi ciah kya ci. Christu kum 1693 ung a om nak ah phaya kyyawng hta ung hteit ne k’taigü tu ciah k’chang tumat ciah a mät ah ng’ngaih ngaih ah om ciah Frances Souchet no Joan ah a m’lung k’nga ng’thong hlah hlak ciah kya ci. A ni cu yum nak gui a hei hei ah phaya kyawng gui a k’daa ung hteit hton ne k’tha na ne a k’taigü gui cu k’chang gui awn kä täng ne nga tu pi kheng geng ciah k’chang ah kya ci.
Francis ma ne hnguh tu ci a u no phih a ni kä tum ngak tu k’khai ah kya ci. A í ah kya hleih ci ung a ni ah om k’ih lah a pumkyä cu teng ung m’nai tu nak vai ci kä om ci. A ni cu a mät hta lam ung a hteh yah ung phih a kya ah ng’hta ne kä lung ng’lang veih ci vai hlü ah kya ci. Joan no a yoih tuk nak ah k’pyü hta pei ah gok ne a ni cu Khanpughi no a tüih ah pyein ne m’o hleih Joan no mü ät m’ih tu ne a pi k’chu hta düt ngui a shang ah kya ci. Francis Souchet a cun ah hteit ne a om tu cu Joan ah phäh ah a m’lung ng’ngaih kä kyäp lo ba ciah kya ci. A cun ung ka no leng ne Joan cu a ni ah om k’ih nng’hta ng’ko gui cu ng’thong hlat lo ciah kya ci. K’chang gui ah k’taigü nak ung a tän ah k’taigü lo tu ne kyün hngüp gui ung phih kä yoi tuk ein ba ne kya lo ci. A cun ung ka no tün ne k’kyawng khui ung om ciah k’chang shing k’chuk no ng’chui khai ah a mi ei ok nak hnging vai ah gunhtot lo hnging ciah kya ci. A k’hngu ah a ni ah k’tha na ne a bi loh nak hnging awn a hei duyai k’chang gui am phih pe ta ne gunghtot lo hnging ciah kya ci.
Christu kum 1698 ung Joan cu duyai k’chang gui gunghtot nak ung nak ung a m’lung k’puum ne bi ne a ni ah yoih tuk gui man cun phih kä bi ba ciah kya ci. Duyai ci gui cu a ni ah lo ne a gunhtot gui vai ah ng’shang lo ci gui. A k’hngu ah a ni ah im cu duyai ci gui, hmei hta gui, a ghü ng’vai lo gui lah goipyam ci gui a mi om nak ne a mi yeikyai nak ah im ah kya lo ci. A cun ah im cu Khanpughi no a ghun m’htei ah im (Providence House) ci ne k’chang gui a k’daa no a mi hmat lo ah kya ci. Joan cu a ni ah no a gunhtot vai ah ng’yak hlü ne gok lo ci gui a gunhtot nak vai ngui cu om ci ci ne pyein Pyinhtit Shangpughang no läi ngui gui a ghon nak ah ng’it nang am kä ning pe k’khai, cung phih Shangpughang ah ta Shangpughang ah kya ciah Khanpughi no läi a ngui ng’it a cum ah ning k’hmon pe khai ci ne k’tha pe ciah k’chü m’kha pyein ci.
Kho m’dek ng’min lo ne a cun ah Providence House cu a hei ah a mi k’plon ah kya ci. A cun ung ka no k’chang gui a gunhtot gui vai yaica nak a shäng buiawt ne ta Christu kum 1704 ung (The Sisters of St. Ann) ci ah Mamah ng’htoi tumat cu m’düih ciah kya ci.
