Bä ciah Eusebius ah ghünlu a mòng

Bä ciah Eusebius cu Christu kum 283 ung Italy ghunkhaw, Sardinia Mânggo ung ng’tüi ciah kya ci. A ni ah pa cu yumtu ng’bum ah phäh ah a hngun a peit kon ah a nu no Eusebius cu Roma Mânggo ah a khah püi ah kya ci. Thuuk ciah ng’thu k’ni k’khei khai ah yathuu a gah tuk on ah Italy khaw hliip lam ah om ciah Vercelli Mânggo ung Khanpughi ah mòng lam gui thähla m’thei m’thang khai ah a mi tüih ah kya ci. Christu kum 340 ung a cun ah Mânggo ah Taigü Mâng ah kya lo ci. Eusebius cu Boiphaya gui awn a täng ah om ci gui ah a k’htük pi ah Taigü Mâng ah kya lo ci. A cun ah a täng ah om ci gui ah Boiphaya gui am k’taigü nak, ng’mü m’cha lam ah k’tha na ne bi loh nak ung a k’thagui gui cu a k’ni ah pe ne bi ciah kya ci.

Christu kum 354 ung Milan Mânggo ung a mi bi ah yum nak gui ung khong mang ne bi ci gui kho mang k’chang gui ng’bum ne a mi ng’hta ng’ko nak ung Bä ciah Athanasius cu ng’ngahtüh hnguh hmat gui kä täng ein hleih m’thei m’thang ci gui ah Arianism no ng’hnguh ng’tuk püi ne a ci cu Eusebius no kä kyüh ein ne gung tu ciah kya ci. Arianism cu Boi Yesu cu Khanpughi ah kya ci ci cu kä yum ci ah vuata ah kya ci. A cun ah Bä ciah Athanasius a gung tu ah phäh ah Emperor Constanius no a ni cu Palestine lah Eygypt khaw ah a k’täm ah kya ci. A kyä ung a hlui a k’ni ah kä hlui ein khai ci u ne lam pung a ng’däih ah kalu na u ne khaih toih toih ne a mi khah püi ah kya ci. cunt u pang ah phih a ni cu Catholic yum nak ung m’hteng ciah kya ci. Eusebius cu Bä ciah Athanasius no (The Athanasian Creed ) a guk yah ung a ni ah hnguh hmat gui awn a k’ni ah ng’khai ne gung tu ciah kya ci. Christu kum 354 ung ka no a shih nak kum ah kya ciah  Christu kum 371 a chüt hleih Cang ci ah Christian yum nak gui a k’ni ah pyang tham ghüt ciah kya ci.