St.Francis lah a khòtüi 2
1 St.Francis cuh a khòtüi ah mòng ngkyüm hleih shuìktä hlü ung tän kkheî mòng kchî nglung gui phlän neh ahei mòng gui shuileî vai mkot khmòng neh ngshíng hleih shùiyap neh kchàng ah ngkhän hleih ghin omnak cuh a i ah a ngphlàn akyòng ah chüt hnguh hnging vai na gung gui ci.Tumat lah tumat mi ngyùmlo ung akya ah hlo ah St.Francis cuh khò khngì kcha lah ak’yo pí ah ghìng om ci a teng lo ung a mlùng kä k’üp hnging neh ng’äi pyàng neh mtaam hleih ahei a hngùn kghìng gui phih kdäk neh chü ci.Ani cuh a hngùn kghìn van on nghtàngkò ngpòng ng’òp neh papai phih mthei mthàng neh ami hnguh hmat om ca akghìng gui vai hlü ah Kkhaanpùghí mtaam vai chü phòng ci.Khòmdek hngéit pèi on ngpòng nak ung hnguh hmat kcháng gui ah ami mtaam ah hlo ah kä kya neh hlùmmlèi tän kkhêi ciah hlo a phih a hngùn kghìng gui on mhngi ngkyunak on phäi nà vai hlü ah thà ci.A cun ah kya hleih a kghìng gui mhtéi vai ka mà mòng ah ka ngngài ci.St.Francis ah hluläk St.Bonaventure no a saya ah mòng a pyéinnak ung ani cuh akghìng gui ah ngtünnak ah akhong ah kya ca Kkhaanpùghí ah mòng a ngah-tühnak on yùm mhnginak on bé lo neh akghìng k’yô pí am phih ka bè htá ciah chü htî ci.Cun ah mlùng ngngaih cuh kä nghmat ca yùm mhngînak ah ngngài neh aláng düüt ah kä khtät khin nei.A i ah kya hleih ci ung cun ah hlo ah mlùng ngngaih cuh amät ah a ghinlù a ghü kcêing nak on ngphan ca kya ci.Kei cuh akhòtüi pèingléng khòmdek mòng ngah-tühnak ung Kkhânpùghí no a tüî ah khòmdek ah bänak yùmmnài vai ah mòng ngkhái hleih ngah-tûhnak kä cùm bòi ung khòmdek on mi ngshün ngphan mdángnak ung ani ah a kyómhtáng ah mòng phäí lah bè a hlo ah thà ah kchi nglung kä mang ung khòmdek ah kkhân ah thà ah mi mlùng ngngaih cuh saya mâng gui vai hlü ah,plohmhtah ci gui vai hlü ah aktén ah mangcâ vai bü ngngaih ah kchî mgeinnak kä om en hleih mdímdam ci gui ah mi kya lo khai.Mtäng neh pyéin ah akya ung khòmdek ung om ca a hngùn kghìng avan nggèi neh mi ngpòng ca mi ngngaih ung gìchát neh mangcanak lah ngngaih nak om lo khai.St.Francis ah dúkhaih neh ghin omnak akya ah gìchát neh mhtíng neh omnak gui cuh omkní lák gui ah phäh ah akkhân kphòng ah hlü ci bäng ah kä kya neh a ngyung ah lát neh läk vai tumat ah kya ci.Khoh-thêm gui ngngaih ah mangkhaploih gui,kchàng ah kka ah thà vai ciah ngngaih gui kä yùmnak ah kya ci.
