Mi ng’dü im khaw diimdam kai ah kya lo khai ah mong

Mi ng’dü im khaw kä diidam ein khai ah a k’ni ah pyantham ba vai cu khom m’dek k’khan ah om ciah k’chang gui a van ung tavon om ciah kya ci. Papa Shangpughang no a guk na ung ng’dü im khaw ni khai ah pyan vai a kya ung (See, Judge, Act) awn bi loh vai kya ci ci cu om ciah kya ci. Papa Shangpughang no k’chang gui a van tuhchü mi buiawt gui cu mi khe hnging vai cu a hngüp täi mi ghinlu ung a khotüi pei ng’leng a k’ni ah k’chüng k’hlei ne ng’thong hlat ba khai ah van no ng’lung lak na ne bi vai kya ci ci ne pyein ci.

Khawtüi pei ng’leng pyantham ba nak ung om püi ci gui ah k’phyukkha chihla gui, Shing ghüng gopai gui a k’ni ah m’htei m’tha ne ci ung vah khawtüi ni ne, kho m’dek cun phih cun phih k’chüng hlei hleih geitko mangca vai gui om khai ah kya ci. Mät k’cho lam ung bäng ah kä kya ne m’va kho a daapi ung Shing ghüng gui chuk ne mei awn a mi m’chih ne geitko ci gui daa hleih, khawtüi no ng’yak ne a diidam bäng ah kä kya ne k’phuk k’kha chihla gui phih ngon shep ne ci ah kya hleih khotui pe ng’leng gui dii lo ne mi ng’dü im kho cun phih ka gai lo ba ciah kya ci. Cun kon ah diidam lo ci gui ah mang man gui a k’ni ah kä htin ne goh ghüi ghüi düt ah phäh a phih khai, ngui ghui a shäng a mi gah vai a phäh ah kho m’dek co ne ghui gui a mi lak gui ah phäh khaw m’dek gui ng’min lo ne khom’dek cu dii lo ciah kya ci.

Khotui pei ng’leng dii lo ne a kya ung theing ciah khaw k’chi cu kä gah lo ba hnging, ni ciah khotui khok’aa gui kä gah lo ba  ah kya ci. a cun ah a kya lo ung k’chang gui cun phih goi pyam nak om lo ne dudong ne goipyam ci gui phih daa lopihti khai ah kya ci.