K’chang-ah Ng’thong ng’hlah Nak
K’chang cuh kho kum (35) kä k’pha pha-ung ak’tha yum yah ca kia neh Khanpughü-ah ni bä nak gui cuh kä hmat pha k’ca kia ci.
Kho kum (30) phlän lo neh 40 50 hlok a gok lo-ung a yan ka hlo-ah a hteh nak hlü-ah hteit neh kä gah lo ba neh a om hlü päng-ah kä om lo ba hlot kon-ah ak’hmo yah-ung “ka k’tha gui-awn ka m’chüt hnging ci, ka gai ci, ka bä ci, ci gui te lah “ka ng’yak hlü-ah kya khai ” ci te gui cuh maih lo neh “Khanpughü-aw na ng’yak hlü-ah kia hlä.” ci-ah k’chü m’’kha-ah ng’hlat lo ci.
Khanpughü cuh nu-ah puk khui k’kyong-ah mi om yah ge-ung na m’htei m’hta gui neh na om püi gui ca kia ci. Cunte mikmi noh ani-ah na om püi gui-ah mong cuh kä mi hmat pha ca kia ci. Cunte kho kum 30 abe lo lei-ung “Kei cuh nang ning tüi pyang ca K’Khanpuhgü nei”ci-ah am’dang nak hlü-awn kä hnguh hnging-ah K’Khanpughü-ah kia nak cuh k’chang-ah m’lung-ung om lo hlak dca kia ci.
K’chang cuh kho kum 40 a che lo-ung ng’mü van m’chüt hnging ca k’chang tuamt cuh ng’ya lo hlü ci. Cun cuh Khanpughü-ah kia ci. Khanpughü mät cuh ami ka vai hlü-ah shäm lo hlü ci gui. A k’cang-ah ami hamat-ah Khanpughü noh a hmat gui vai-ah k’tha lo nak gui. Shin yah-ung cuh vuuk nak gui-awn be ca ghün om nak ci phih chü hnging-ah kia ci. K’taigü bawi gui lah ma mah gui pang hngo ng’pät neh k’chang hngei gui-awn täng tu neh om ci gui hnging-ah a ching-ah kia ci. Hlawm lei awng pan ci gui noh phih ami te gui nong neh a hngei ma mong gui ng’plon neh bi ci gui-ah aching-ah kia ci. K’kyong khui mah gui phih ami k’kyong khui-ung kä ng’hloi nak gui ng’ngaih kä ng’hmat nak gui-awn be ca aching-ah kia ci.
Shin yah-ung among (6) kawn ng’yung neh ng’tai nak vai lah ng’khawt ng’gei nak-awn be ca k’kyong khui vai cuh teng hnging-ah kia ci.
- Ng’chu ng’la goi-ah m’hngi ng’kyu nak cuh i hlok-ah thuuk ci-ang? i hlok-ah tah ng’chit ci-ang?
- Ng’chu ng’la goi-ah m’lung tumat noh tumat i hlok-ah am’lung yei khai-ah om püi hnging ci-ang?
- Tumat noh tumat i hlok-ah thüi hlei m’neh m’awh khai-ah ci ci-ang?
- K’kyong khui-ah khan-ah i hlok-ah thing ling hnging ci-ang?
- A hngei k’hngumi gui-ah m’lung ng’ngaih lak nak cuh i hlok-ah däm ci-ang?
- Ani yum äp nak-ung i hlok-ah khäng htek neh om ip ci goi-ang? Ci gui-ah k’khan-ah ng’chak ci-ah kia ci.
