K’hngumi lah K’pami-ah Ng’cha Nak Gui

K’hngumi lah k’pami cuh ak’hngu lah ak’pa-ah kia ci goi-ah kia neh cuh thum goi, ng’ngaih goi cun phih kä täng hnging ca kia ci.

K’hngumi phih k’pami phih kho k’hngüp lüng neh bi bi lo neh ani kya-ung bawng bai neh kyä goi hleih om-ah ani gok lo ba-ung cuh ng’düm hlü ci goi-ah kia ci. Cung phih ng’düm goi cuh kä täng ci. K’pami gui cuh ca bawh k’chei neh, TV bawh dan neh, ng’gü ng’lah nak gui bawh teng neh a bawng bai cuh m’kyäp ci. K’pami gui-ah thum cuh amät hta bäng cuh om neh akyä a nat cuh m’gei thei ca kia ci. Cun cuh ami m’lung-ung ami kyä gei ci-ah ng’ngai ci gui-ah kia ci.

K’hngumi gui-ah thum cuh cuh cun-ah hlo-ah kä kia ci. Ngami gui cuh ng’thu ng’hta hlü ci gui-ah kia ci. Im-ah ami om-ung ma neh ami ng’hta püi gui vai cuh ami cei hta vah om hleih ama-ah lo lo lok ci gui. Cun ge cun-ung amät hta om neh m’düm thei ca k’pami-ah phäh-ah kä ng’hloi lo ba ca kia ci. K’hngumi gui cuh ami bawng bai gui ami teih püi gui-am ami m’thei m’kan tu ba-ah akia-ung vah ami bong bai cuh gei ci-ah ng’ngai ci gui.  

K’hngumi gui cuh vuuk nak, kä ng’hloi nak aom-ung tumat ku ku-am m’thein tu hlü ci gui. K’pami gui-ah kia hleih kä ng’hloi nak gui ami ng’yak lo-ung m’cha ng’lang hlü ci gui. Cunte k’hngumi gui noh cuh ami m’thein tu gui düt-ah ng’ngai ci gui. K’pami cuh vuuk  nak bawh kat nak boh ami bui awt lo-ung m’cha m’lang hlü ci-ah m’clung cuh k’pami päng-ung om ci. Cun-ung cuh ng’ngaih goi cuh kä ng’hmat lo ba neh ng’gen nak vai lam täng-ah ng’et lo ci-ah kia ci.

K’hngumi gui-ah m’lung cuh a kyum kai yäk ci. Ami m’lung a ng’kyaak ba yah-ung kat nak gui cuh shui thei ci gui-ah kia ci. Cun cuh k’pami noh kä hmat-ung ng’gen nak vai cuh ng’et khai-ah kia ci.

A caw kia hleih ca guk ci-ah k’chang noh k’pami lah k’hngumi cuh ani ng’täi nak-ah kho m’dek cuh kä täng ci ci neh m’tu m’täng ci-ah kia ci.