K’Chàng nawh khaw m’dek púm a gah ung phih, a mät-ah hngùn a dí ung ani-ah phäh-ah i-ah kä mòng khai.
A cun-ung tün neh Jesu nawh a-hlu-läk gùi àm piéin neh ani cuh Jerusalem-ah hteit lüng neh k’chàng ng’vái gùi, k’tài-gü ng’vái gùi, k’chü-m’cäi k’süm gùi-ah kut-ung akia-ah a zái-cã vai-ah màwng lah ami ngáwn lo vai-ah màwng, a k’thum k’hngüp ung a ghin lo bà vai-ah màwng m’dáng gùi te ci-ah kia ci. Petru nawh Báwi Jesu cuh, a phé-ah chü nehtah “Khãnpùghí nawh kä zùm khai; Báwi aw, nang ung sin-a hlo, a pihtá-a phih kä kia-eìn-hlä,” ci ci. Ani nawh Petru ng’hlah sí-neh “Nang khaw-’nget, ka hngú-ah hteit-ä. Nang cuh, ng’vän nák-ah na kia ci. A i-ah kia hleih ci ung nang cuh, k’chàng-ah màwng lam bäng, ng’ngaih-tühneh Khãnpùghí-ah màwng lam ung kä na ng’ngaih-tüh ci,” ci neh gen ci.
Cun kon-ah, a-hlu-läk gùi-àm, Jesu nawh a piéin lo cuh, “Ka hlu na läk hlü ci nawh a mät nawh a mät ma neh a mät-ah Sing-m’kang k’tùng ’kot neh ana läk vai. A i-ah kia hleih ci ung a mät ah hngùn k’phión pui tuk ci nawh a hngùn m’dí khai. Kei-ah phäh-ah a hngùn m’dí ci nawh ghinnák gah khai. K’Chàng nawh khaw m’dek púm a gah ung phih, a mät-ah hngùn a dí ung ani-ah phäh-ah i-ah kä mòng khai. Kä cun-ung, a hngùn-ah phäh-ah, k’chàng nawh i-awn ang a m’thóng m’hláí kò.
A i-ah kia hleih ci-ung, k’chàng-ah htá cuh a mät ah Pá ah bänák lo püi neh Khãnhtapup gùi mah-ah lo khai. Cun ung k’chàng päng-àm, ami om kia-a hlo-ah pe lo gùi khai. Nangmi-àm, a k’càng-ah ka piéin cuh, k’chàng-a htá cuh a mät-ah ghin khàw-ah a gok lo hnguh tu neh kä sih càng-ah om khai-ah k’chàng m’sah sin-ung ng’düí tu ci gùi.
