Ng’chum Nak Lah Ng’tai nak

K’chang päng cuh ng’chum ng’bui nak lah ng’cha ng’tai nak ci cuh bui awit tu man ci bäng bäng-ah kia ci.

K’hmo hta yah kyang kai lo tu thai yah-ung ng’hnguh ng’chum neh a täng-ah ana-ah luum pyan vü man te-ah teih püi gui cuh ng’vai lo-ung ng’hnguh ng’cum ba vai cuh kä ng’loi ci. Ng’hnguh ng’chum na-ung phih kä hmat ba kä k’shing ba-ah teih püi gui phih ak’da om ci. A müi k’shing ba neh ang’ming kä hmat ba gui-ah teih püi gui cun phih ak’da om ci.

Ng’vai lo kon-ah ng’hnguh ng’chum lo-ah teih püi ng’kho k’chang

K’hmo yah-ung kä ng’hnguh tu man te ng’vai lo kon-ah ng’chum lo neh shih güt chüt ng’hngu ng’teng neh ng’khot ng’gei neh om-ah teih püi gui phih da hnging ci. Mät-ung gung nak ahlü yah-ung pei-ah na om püi neh na gung tu ca teih püi k’ni gui a da-ah hlo-ah a ngoi-ah phih kä ng’hnguh ba vai-ah teih püi gui phih da hnging ci.

      Nu lah Pa

Nu pa lah hta k’hmo gui cuh k’hmo yah-ung a kong ät-ah om ghom neh api-ah ng’kyäng lo-ung ng’lak hlat nak cuh om cang ci hti-ah kia ci. Ak’da pi lei cuh ami ng’vai lo pi hti-ah ci-ah ami  nu pa-awn ng’et pi neh om lo ba ci gui-ah kia ci. Nu pa gui kä mi om ba kon-ah cuh mät-ah kho-awn mät hteit neh gok nak hlü-ah hteh vai-ah kia ci.

       Nu be Phä na gui

Ng’gei ba shüm ng’gen ba shüm-ah a na-ah om vü te-ah nu be phäi na gui cuh kä ng’et neh om-ung phih shi hla hlu-ah ng’et-ah kia ng’gung tu ng’kyu vai-ah kia ci.

      Cun gui bäng-ah kä kia neh a hngei po k’chang gui phih ng’cum ng’dawn lo tu hnging ca kia ci. Cun gui cuh po k’chang ci lah k’chu cei gui-ah kia ci. Cun gui cun phih shih güt chüt hleih ng’gui neh hteih vai-ah kia hleih hnguh hmat nak thei, m’gein tu ng’kyu nak, m’hngi nak gui-awn ng’be tu ng’kyu neh hteh vai hlü ci.

      A m’shah lei noh ui, ai, vok, miin lah me gui cun phih m’hngi u neh ng’htei m’hta thei ci gui-ah kia ci.