Ng’Vài awn a m’tu m’täng nák.

A hei a m’tu m’tängnák bà cuh Khãnmòpi ghin khaw cuh tuinú ung voih ung om ci-ah ngá-päng ’kiüp ci-ah ng’vài awn täng ci. ng’Vài ung ngá bé chü-tah ngá k’sùi gùi nawh ’kóng-ah hteh püi neh ngoh u nehtah a k’ní ghü neh gang ung m’chäp-èi u neh a k’sé gùi läi ghot ci gùi. A cun-a hlo-ah, cìn-khàw a lo lo ung Khãnpùghí-ah ng’sä Khãnhtapup gùi kium lo u nehtah k’chàng k’ní gùi k’hli-ah ng’bum nák-ung-kah kä ni-’ci-ah k’chàng ghü gùi neh Thüi kiah, ha ’kiet  neh zái-cãnák-ah mei ung k’htop lo gùi khai. 

“Cun gùi avan mä, Namivan nawh nami hmat ci ang?,” ci neh ng’si gùi hleih a-hlu-läk gùi nawh “kami hmat ci néi” ci neh m’sàng bà ci gùi. Báwi nawh phih, “Cun-ah kia neh Khãnmòpí ghin khaw ah màwng gùi m’thei m’tháng pi ci-ah k’chü m’cäi k’süm cuh a mät-ah m’kíüm ung-kah, khawh a hei hei a k’phiüm k’thai avan plok  neh lo püi ci-ah, im mah awn täng ci,” ci ci.