Ng’thûkní läk lah kä läk

Htum K’Chò khò cuh K’Chò Khò avan ung Bói Jesu ah NgThûkní ma pi kbäih neh ngyak ca kya ci.Cun ah Htum K’Chò Khò ba k’shòn ung phih Mindat,Gó Ngyung gui ah kya te ci cuh u kä om pha hleih akcàng ah pìgò nglung ah om neh Htahtana bi ami bi nak cuh Ng’mèn Thá ung om ciah Kkhoilung Pigo Ngcut Lung KShé Pigo ah kya ci.
NgMèn Thà ciah pyein ung tuhchü K’Chò K’Chàng akda pi noh kä hmat lo ba ci gui. Mindat ung Long Tha. 9 om ci.Tuchü avan noh a láng ah ah ahmat 1,2,3 ciah pyein lo u netah kä mi hmat lo ba a kya ci.
Ayan cuh tuhchü ahmat 1 ah ami chü am hmâ Thà ci u neh 2 am K’Châ Thà,3 am K’Hmòng Thà,4 am K’hngìgüng Thà, 22 am Hlet Lòng Thà ciah ami chŭ man ah kya ci.
Leng lo htük ung guk ah NgThûkní a gok lo nak htük cuh tuhchü ahmat 2 ciah mi chü ah KChâ Thà ung phih K’Khòilung Pìgò Ngcut Lung K’Shé ah kya ci.
Acun ah Kkhoilung Pigo Ngcut Lung Kshe ung tünpong neh om lo ca Kkhânpùghí ah Ngthu cuh Htum KChò Khò ung kyäp kyäp ah yat lo ciah kya ci.
Tuhchü cuh yum ci ktu da lo hleih parish ciah pyein ah htahtana hta gui om lo ci.
KChâ Thà ung KChat,Ngvûi Ngkhum,Lung KShé,Hmâ Thà ung Shingbok Khò KThài,K’Hmóng Thà ung KShet, Kyüì Htá,Khngìgüng Thà ung Mdap lah Khngìlòng lah KHlet Lòng Thà ung Gó ung Bóiphàyà gui cuh om lo neh tamah saya gui mah ah pahta kchang gui on atäng ah htahtana bi bi nak gui om lo ci.

Cun ung mi teng ba vai cuh shô lo chütah thùng màn yò màn düt ah biloh gui om lo ci.
Avai hlü ah pyein ung mü hngün khòngói kä ktàigü neh Ngthukni kyanca mät noh kä teng neh Kyün Khngüp bäng ung ngbûm tu ba neh ami mät ah hmat phäh phäh ah om ci gui cuh avan ghep ah kya lo ci. Oktat neh ngtuk nak,nglung kho ngcuh neh ngvók nak,yung im mang k’hlák ah hteh nak ciah kä ni ca om ih nak gui om lo ci.
Pahta kchang bäng ah kä kya hleih tamah saya gui phih ami mät noh kyaca kä teng u neh hteit hton neh kä mtheimthàng u neh ami kkyongkhui mät hngo ung suhshan ktàgünak kä bi u neh ami màmòòng cuh ngming lo na düt ci gui ah kya ci.
Acun ah kya neh pahta kchang gui mah ah Kyün Khngüp lah pòi gui ung hteh man ah ngnéng düt ah ngbûm tu ba neh ãpat kat phyónnak bi tu ba neh im phäh phäh ah hteh ba cuh thúng màn yò màn düt ah kya lo ci. Acun ah kya neh tumat phäh phäh ung yumnak cuh kä ghìng neh mlung,khngà, kthagui mah neh läk nak cuh kä om ciah kya ci.
Acun ah kä om ah phäh ah pìgò gui lah htahtana ung a i ah kya lo ci gui cuh akhngih nak ung mi teng shüm ko.