Báwi Jesu-ah M’Sí K’Phú awn m’tu m’täng ci.
Cu k’hngüp Jesu cuh imung-kah, lut lo nehtah pinle’kàm-ah a ngoh zah ung K’Chàng gùi nawh lo sí u hleih, ani cuh Tuizun Imnú-ah ’khãn-ah kài neh ngoh ci. k’Chàng avan cuh, ’kóng-ah ng’düi ci gùi. Cun gùi àm m’tu-m’täng neh a màwng a k’dá, m’thei gùi neh a piéin lo cuh, ‘m’sí phú ci cuh, m’sí phú vai neh hteit ci.
A m’sí phú m’sahcuh lam-’khãn-ah ng’kia hleih, Phiú k’khá gùi nawh lo neh eì ci gùi. A m’sah cuh m’dek ng’pám ci-ah, lung k’chóng hngù-ah ng’kia hleih, a k’tén-ah lut lo tu pang neh phih, khaw ng’líng nawh úi hleih, a ng’zung kä htek pha-neh ng’zài neh ket ci. A m’sah cuh, ng’hlìng hngù-ah ng’kia hleih, ng’hlìng gùi ng’läh lo neh k’düi kilik zop ci. A m’sah cuh, m’dek k’ní ung ng’kia neh phia vei, chuk-kip vei, thùm-kip vei hngá neh ng’hlèp lo ci. Ng’Záknák vai-ah k’hngà om ci nawh ng’za hlä.
Hlu-läk gùi nawh phih, k’èt u neh ngamí àm a i ah kia hleih m’tu-m’täng neh na piéin ci ang? ci u hleih, a m’sàng bà gùi cuh “Nangmí läí Khãnmòpí ghin khàw-ah thúk ci-ah màwng nami hmat vai-ah kia ci. Ngamí läí cun-ah kä kia ci. A i-ah kia hleih ci ung gah ci nawh gah lo pí hleih gùi lo pí khai-ah péit-ah kia khai. A u nawh boh kä gah tu ci; ani ung om ci k’cei hngo lák bà-ah kia khai. Cun-ah kia hleih, ngamí àm m’tu-m’täng neh ka piéin-ah kia ci. A i-ah kia hleih ci ung ngami cuh, hnguh láng neh kä hnguh ci gùi; ng’zák láng neh kä k’síng ci gùi. Isaias, ce ng’sä-ah piéin man, ngamí ung bé lopi ci. A piéin cuh, “’ngài neh ng’zák láng neh kä nami hmat khai; teng neh hnguh láng neh kä nami k’síng khai. A i-ah kia hleih ci ung sin-ah k’chàng gùi cuh mik awn hnguh neh k’hngà awn ng’zák-neh, m’lùng awn hmat lo nehtah om-ih ng’thong hleih, ami gàw-pàinák, ka m’gü m’gái péit gùi vai-ah ng’ä u neh ami m’lùng-ah língneh k’hngà-ah pang neh mik-ah m’sìng ci gùi.”
Nami mik nawh hnguh neh nami k’hngà nawh ng’zák ci-ah kia neh bä ci néi. A i-ah kia hleih ci ung nangmí àm a k’càng-ah ka piéin cuh, nami hnguh gùi cuh ce ng’sä a k’dá lah, k’chàng k’ní gùi nawh hnguh tu hlü láng u neh kä hnguh ci gùi; nami ng’zák gùi cuh, ng’zák tu hlü láng u neh kä ng’zák ci gùi.
Cun-ah kia hleih, m’sí phú ci awn m’tu-m’tängnák cuh, ng’ngài vä. Ghin khàw-ah màwng k’chü ng’za tu neh kä k’síng hleih khaw-’nget lo neh a m’lùng k’kiong-ah m’sí m’cáng cuh, a lák. Sin ah k’chàng cuh, lam-ung phú ah m’sí-m’cáng-ah kia ci. Lung k’chóng hngù-ah ng’kia ci-ah m’sí m’cáng cuh k’chü k’ní ng’zaneh a k’tén-ah dàw tu láng pang neh phih, Kä pià hnging neh a säng htá düit om ci. k’Chü k’ní-ah phäh-ah m’thüi m’hlèi k’kalu nák a gah lo ung a k’tén-ah thüì ci. Ng’Hlìng gùi hngù-ah ng’kia ci-ah, m’sí-m’cáng läí-cuh, k’chü k’ní ng’za láng neh phih, sin-ah khàw m’dek-ah’khãn ah ng’ä cäinák, khawh-tang, ghùi, ngùi gùi-ah m’hlè-m’hlaknák nawh khíp hleih, a ng’theih kä ng’theih ci-ah k’chàng-ah kia ci. M’Dek k’ní ung ng’kia ci-ah, m’sí m’cáng läí cuh k’chü k’ní ng’za nehtah k’síngneh a m’sah phia vei, a m’sah k’chuk-kip vei, a m’sah thumkip vei m’hlèp ci-ah k’chàng-ah kia ci.
