Nu Pa Gui-ah Ng’ngaih Nak Vai Mong Gui

Nu pa gui noh ng’hngi aih ne boh kiai m’lung se hleih boh kyai bi hti-ah hngün thoh gui cuh k’hmo hta gui-ah phäh a ngoi ka vai-ah ak’da chüt gok nak gui om ci. Cun-ah kia hleih nu pa gui noh hloi chin gui cuh ning m’thein tu ba gui vai nei.

1. Ami mät-ah bi loh nak tu chin gui kä khai peit gui vai.

K’hmo hta gui cuh ami mät noh ei thei, hlui thei neh ami kya lo thai-ung ami ng’hngän aih ci, a hlui hlak ng’thon ng’hngän aih ci ci neh kä k’se nak gui vai. Cun gui cuh ami ng’vai lo-ung ami mät-ah kho-awn ami ng’düih nak vai-ah k’tha cuh m’di peit gui-awn täng ci. Ami mät-ah bi loh nak tu chin gui kä khai peit gui vai.

• Ami hmat tu hlü nak gui kä khai peit gui vai.

K’hmo hta gui noh hmat tu hlü u neh ami ng’thu mang lo-ung m’lung a sheit hlu-ah kä k’pan m’cai vai. A phe-ah hteit-ä ci neh kä m’ngoit gui vai. Caw ci-ung ngami gui-ah ami hmat tu hlü-ah k’hmo tumat-ung om chin ca m’lung cuh maih neh a ngoi-ah ami hmat hlü gui a om-ung phih kä ng’shi ba dat, ami hmat-ung phih kä pyein ba dat-ah kia lo hning ci gui.

• K’chü gui kä gäi vai.

A k’hmo-am ka ning k’hleih pe khai, ka ning bi pe khai ci neh k’chük’bäi gui kä shüm ca ng’shüi neh m’shawk shü neh na kya-ung ak’hmo-ah aning yum nak cuh na m’di-awn täng ci. A sho lo-ung nu pa-ah k’chü gui cuh i-ah kä hlui tä lo ba khai.

• K’hmo-ah pyein cuh kyäp-ah ng’ngaih peit vai.

A k’hmo-ah m’lung k’kyong-ah ka ana m’thein tu gui-ah akia-ung kyäp-ah ng’ngaih peit vai hlü ci. A k’ni-ah kä ng’ngaih pe neh kä cun-ung a hngei täng-ah a k’chü m’chün pe neh kia-ung am’lung kyong om ci gui kä pyein lo ba hlü neh amät bäng noh am’lung-ung k’üp neh om lo thei khai.

• K’hmo gui kä k’shet dam nak gui vai.

Nu pa gui noh ami m’lung a sheit-ung hta k’hmo gui cuh k’shet dam nak gui. M’lung a sheit-ung k’hmo gui-ah ma-ah ng’plah ng’tang neh voi ghoit neh om kya nak gui hloi vai. Kä cun-ung hta k’hmo gui cun phih ami m’lung a sheit täi hleih a nu pa-ah om kya te cuh thei tu neh mi om kya-ah hlo bä bä-ah mi kho neh na läk tu gui khai-ah kia ci.