Nu Pa Gui-ah Ng’ngaih Nak Vai Mong Gui
Nu pa gui noh ng’hngi aih ne boh kiai m’lung se hleih boh kyai bi hti-ah hngün thoh gui cuh k’hmo hta gui-ah phäh a ngoi ka vai-ah ak’da chüt gok nak gui om ci. Cun-ah kia hleih nu pa gui noh hloi chin gui cuh ning m’thein tu ba gui vai nei.
- A hngei k’hmo hta gui-awn m’täng neh kä neh kä pyein nak gui vai.
A hngei k’hmo hta gui-ah kia-ung cun-ah bä ci gui. Nang lei kä na kia tu ci ci neh m’hnem neh kä pyein nak gui vai. Cun-ah ci gui cuh k’hmo hta gui-ah mät noh mät ääp nak-ah m’lung cuh m’di k’hmaih peit gui-awn täng ci. Cun-ah pyein nak gui cuh ng’u ng’sheih nak gui m’lung k’kyong-ah ng’htun neh k’chang k’hli-ah ma-ah ng’cawih tu hnging nak gui lah ng’dang ya pyein hlak nak tu hnging gui cuh di maih hnging khai-ah kia ci.
- Kat nak gui ami boh-ung phih kä m’shuk k’chak gui vai.
K’hmo tumat noh kat nak tumat kuku abi-ung k’hli ng’lung hngu-ah phih kiai, a hngei k’chang gui-ah hngu-ah phih kiai ami hmai thui khai-ah k’she k’dam nak gui neh kä ci vai. Ami kat nak gui phäh m’cäi gui hlü-ah akia-ung kyüp-ah chü neh m’cäi vai kia ci. Kä cun-ung a ngoi-ah kat nak abi-ah phäh-ah cäi k’tat neh kat nak gui aom-ung phih hle hlak lo thei ca om ih nak täng-ah ng’hlat hnging ca kia ci.
- K’hmo-ah gän nak, kya tu hlü nak gui cuh kä chiip peit vai.
Nu pa gui-ah kia hlü düt-ah hta k’hmo gui ling neh kä m’hteh gui vai. Ak’hmo-ah gän nak lah a kya hlü gui cuh teng neh k’tha peit vai. Nu pa-ah kya hlü düit-ah ling neh k’kyep neh kya hlak gui-ung ami m’lung chiip nak peit gui cuh da lo neh nu pa gui-ah pe-ah kä om lo ba hnging khai gui-ah kia ci.
- A ng’yaak hlü päng läk pe neh hting’ ling nak kä k’hmaih peit vai.
K’hmo noh kyaap neh am’hlo täi hleih am’hlo päng peit cuh k’hmo m’di-awn täng ci. M’hngi nak lah hting’ling nak cuh taga khai-ah bi peit vai. A ng’yak hlü päng ci peit-ung cun-ah k’hmo cuh ang’vai lo-ung amät-ah ng’yak hlü bäng-ah avan kya vai ang’yak lo hlü-ung am’lung-ah hlüi nak cuh hnguh hnging ca kya ci.
- K’hmo-am a ching kä peit-ah kä om vai.
Phone-an Internet gui bäng gui mang hlak neh m’hlum gui neh ngami-awn a täng-ah ng’lah vai, ng’thu ng’hta vai gui nong neh phih kä kya vai. K’chang-ah k’hmo yah cuh a shäng hta -ah kia ci. Nu pa gui-ah m’hngi nak yei nak gui kä kyah tu ci-ah k’hmo gui cuh ng’htäit nak van-ah ng’ngaih tu peit vai ng’yak hlü gui cuh da lo neh hngün hngawk nak gui-ung vuuk nak gui hnguh hnging ca kia ci.
Hta k’hmo hta gui cuh nu pa gui-ah pü püi gui-ah kia u neh ami na hnguh tu gui vai-ah ni pi ca müi gui-ah mi kia hnging vai cuh mi ng’ngaih na kom u.
