M’lung A Sheit m’kyeim Nak
Go nak a om-ung Gai nak vai shei om khai.
Vukk nak aom-ung m’cha nak om khai.
Ng’shi nak aom-ung m’shan nak om khai.
M’lung a sheit-ung m’kyeim nak om khai.
Na m’lung a sheit-ung na m’kyeim nak vai cuh na hmat vai hlü ci.
Na m’lung s shit nak gui cuh u-ung phih vuuk kat nak kä om-ein khai-ah na m’kyeim hlü naw?
M’lung a sheit nak gui cuh kyäp-ah na ng’ngaih tu pe khai-ah k’chang bäng-am m’thein tu vai. M’lung a sheit nak gui pyein-ung thüi nak, m’lung k’tha a maih nak, di maih nak, m’neh nak, leim bai nak, ami na nong nak, i kä mi na hnguh nak tu gui lah ami na yo nak gui phih ng’cawn hnging ca kia ci.
Cun gui bäng -ah kä kya hleih mät-ah tai nak lah yei nak gui phih m’thein tu vai.
Vai hlü-ah nang cuh k’am-ung tui na m’awh khai. Tui cuh ng’ling neh ang’kyah lo-ung a chüm cuh k’hmawn peit vai hlü ci. Cun-ung vah tui k’khu cuh k’pung-ah lut lo hnging khai-ah kia ci. Kä k’hmawn-ah nong-ung k’am cuh kyek hnging ca kia ci. Cun-ah hlo-ah m’lung a sheit nak gui, m’lung ng’ngaih gui cuh kyäp-ah na ng’ngaih tu pe khai-ah k’chang tumat-am k’hmawng neh kä m’thein tu-ung kyä k’kyong-ah m’neh m’awh nak gui cuh kop kai lo hnging ca kia ci.
Na m’thein tu vai-ah k’chang cuh na om ih gui avan ning hmat ci-ah k’chang tumat-ah akia vai hlü ci. Na ng’ngaih ning hmat neh nang-ah kat-ah kä kia ci, nang cuh k’chang k’ni nei ci neh ning ngaih tu pe khai-ah k’chang-ah akia vai hlü ci. Cunte ani-ung kah na m’lung a thüi nak gui, a sheit nak gui avan ni ng’hmaih pe hnging khai ci-ah lei kä na ng’ngaih u vai. A ni-ung kah cuh “ ka ning hmat pe hnging ci nei “ ci-ah k’chü m’kha bäng cuh na äp vai. Na m’lung a sheit, na thüi nak gui cuh ng’hloi neh hngip ca k’chü ng’lung gui shui neh na m’thein tu vai.
Na m’lung a sheit nak a kyeim vai na ng’yak hlü-ung
- A ching na ghü vai (m’lung kä sheit yah-ung)
- Hngün nak ghü vai. (u noh kä ng’yak-ein nak tu vai-ah hngün)
- K’chang na ghü vai. (a van-am kä m’thein tu vai)
- Mang vai-ah k’chü ng’lung gui ghü vai.(hngip neh ng’ngaih phya ca k’chü ng’lung gui cuh ghü neh pyein vai.)
Shing gui cuh m’lung a sheit nak gui m’kyeim nak hnging vai-ah ni ca lam am’shah-ah kia ci.
