Kyawng k’kài lah Ng’Thûkní ng’thêî

Kyawng k’kài gui noh Ng’Thûkní ami ng’thêi cuh KChò Khò ah Pyinhtit Htahtana kbî gui ami gok lo ung lèng lo ciah kya ci. Pyinhtit Htahtana k’bi gui gok lo u neh KChò gui am Ng’Thukní m’thei tu gui hlü u hleih phih cun yah ung m’ghû ng’tha neh, tu kaih neh o eì neh ana om ci gui ah phäh ah kä ng’hloi ci.
Aktung pi ah KChò gui cuh ami ngbûm ng’bäî ei ók lo tä hleih ami ngshon htung pakkhui lah ami lèi bei ng’tuk ngkoi gui laih laih pyein ci gui ah kya neh Pyinhtit Htahtana Kbi gui cuh Ng’Thukni ami m’thein mkan mtheimthang tu gui vai ah kä ng’hloi ci.
Ami goi lo yah bäng ung Boiphaya Mámah ni ah hteit u neh seitui seilung ngyoi ngtuk neh nghta ngko pûi ci gui ah kya ci. Kä cun yah ung im lah lo mhlân neh kholo mamoong laih laih ci gui ah kya ci.
Khotui yah ung lo laih laih ah om neh lo bi ci gui. Khohlik lo hleih kho vok kbaih kyan,kho cha lo hleih yu ngkoi hlei hlá neh go ngshai neh kho cik,mshi nggéit u neh kä ngshong phung u hleih Pyinhtit Htahtana kbi gui on kyäp ah nghtangko neh Khânpughi ah NgThukni ah moong ami nggengshoi vai ah kä nghloi nghlak ci. Acun ah kä nghloi nak gui bäng bäng om lo chütah Pyinhtit Htahtana kbi gui cuh nghloi khai ah nì ami shuilei nak k’khit ung akhmo gui phaya kyawng ah kyawng mkai gui netah kyawng ca phih mthei gui neh Khanpughi ah NgThu phih mthei gui ung vah gah khai ah hngu lo ci gui.
Acun ah kya chütah ca mthei khai gui phih ngvat u neh kyawng im co neh ami mät noh phih ca mthei tu u neh ci lo u hleih KCho ngvai gui cuh ami hta khmo gui kyawng ah tha lo u hleih kyawng ca phih mthei neh Boi Jesu ah mòòng cun phih mthei u hleih Pyinhtit Htahtana Kbi gui ah phäh ah ami bü cèng gui cuh nghloi nghlak lo ci. KCho gui cuh ami goige lo ung seilung seitui phih ngyoi tu u neh ami htana phih ca ngthei hngu hmat neh ami om cuh ni ciah hngu lo ci gui.
Acun ah Lung KShe ung Boiphaya,Mamah gui noh avan ka vai ah nghloi nghlak hleih ami bi lo cuh KCho Kho bäng ah kä kya neh Yò Mva kho yung pum yat neh a ngming thang lo ci. Aktung pi ah pigo long tha gui ung ami ânâ om neh van no ami hluitä ah kchang gui ah htana gui am ca mthei gui neh tän k’hlüng ami kai hnging vai ah MVa Kho kyawng ah tha tu u hleih hngu hmat kchang gui ah kya lo tu ci gui.
Acun gui ung kah gui amshah cuh Khoilung ung kah Kyüì Kkhui om cuh Vonthok ah kya lo neh KShit KHmoi ah ka Saya Mang Kyüi cuh Malaysia Penang kho ah chüt ca ngthei neh lo ba neh kyawng ung ca mthei lo ci. A hta gui cun phih kyawng ca lah Kkhanpughi ah moong ngtheinak ah kyawng gui ung kai tu u neh Kyüi Kkhui Om lah Kyüi Kshui She cuh boiphaya ah kya lo tu ni neh Kyüi Mgu Mang cuh mamah ah kya lo tu ci.
Ma kbäih neh MVa Kho ah yu kai tu ci gui ung kah Htakhin Aung Min cuh ghunkho lam ah a ngvai ah kya lo tu ci. Acun ah hlo ah akhngu ah kyawng ca lah Ngthukní mtoi neh ngthei neh hnguh hmat kchang gui ah kya lo u neh htahtana lah ghunkho gui ung hngu hmat kchang ah kya lo ci gui tuhchü cuh akkhak om lo ci.

Acun hlok ah KCho gui am ongtang nak gui na pe gui ca phaya ca lah kyawng ca mtoi neh hmat vai ah ngtheingthagnak cuh tuhchü mi kdäih vai hlü lo ci.
Om kho she neh a ghunkho pum ngtuk ng’ah nak on be ca tuhchü cuh kyawng ca lah phaya ca mtoi neh akni ah ngthei ba vai ah akni pi ah akhing ah kya ci.
Catholic Htahtana ah hluhngün om moong gui mi teng ba ah akya ung kchang gui noh kä mi mchüt gui cuh Htahtana noh Kkhanpughi a yum äpnak on a mchüt man gui cuh akkhak mi hngu hnging ci.
Tuhchü ngtuk ng’ah ah hlo ah tah kchün tu ba hleih ami ngtukkho ah kya ca Catholic lah Islam ah ngtuknak dìmgei hlak ci cuh Boi Jesu ah Nu Boi Maria ah kya ci.
Khomdek pum ngtuknak on mchüt neh muslim gui ah lat yop netah kpoih ba ca catholic gui phih muslim ah lat yop lo ah ci hleih Lepanto Kho ung ngukngtoh nak om lo ci.
Acun ah ngtuknak ung ngtuk ng’at mih neh mchüt ngnäng laih laih ca muslim gakkap täm kkhak lah catholic gakkap täm kphli ami ngtuknak ung Catholic cuh kä ngnäng khai ah avan noh ngngai tu pang láng hleih phih Papa Shangpughang noh Nu Maria ah nghuingpa vai ah shä hleih yùm ci ktu avan noh läk u chütah avan noh a cäícat vai ah Catholic Htahtana cuh ngnäng man ca kya ci.
Acun ah hlo ah Myanmar KChàng Khlí tu neh mchüt neh yô kkà na neh uk khai ngngai ciah a ngkyìng khlui gui mi mchüt vai cuh Kkhanpughi ah nghuingpa neh Nu Maria äpnak on vah mi mchüt khai kya ci.

Hlehnget li kkhìm akkhak tu ba tha neh ngtuk ng’át hnging pi kbäih ca muslim gui noh Nu Maria ami äp nak on ami mchüt ah hlo ah ghátghum ngetngong pi kbäih ca a ngkyìng k’hlui mi mchütnak vai cuh Nu Maria ah vah kya ci. Ashin ah amòòng gui ah hlo ah ca phih ngthei neh phaya phih hmat vai cuh Pyinhtit Htahtana kbi gui noh lam leh neh ami na mthei gui ah kyawng ca ngthei yah ung phayaca phih ngthei ung khomdek mchüt nak lah khoknget mchüt nak cuh mi gah hnging khai.
Tuhchü kyawng kkai gui am kyawng ca lah phaya ca atäng ah mi mtheinak on Htahtana noh khokum phya kkhak ung a gah te ah kyä hla ngmuimcha ongtangnak mi gah ba khai kya ci.