A K’ni Shäm Neh A K’se Nong Vai

K’chang päng cuh üp äi pi ca nu-ah puk khui-ung k’cha k’ko om neh a gha nak-ung mi ng’tüi lo ci ci cuh mi hmat yop ci.

      Cun-ah puk khui-ung mi om yah-ung nu noh i hlok k’cha na ng’ngai gui khai ci cuh kä mi hmat man ci.

       Kyä taak mah k’hngumi nu tuamt noh apuk khui khui-ah om ca a hta-am “ka hta ang’vai lo-ung k’kyong khui ani vai phäh-ah ni neh bä ca hta k’pami-ah akya vai, hta k’hngumi-ah akya vai ci neh ak’ni bäng bäng cuh ng’ngaih u ci-ah kia ci. U noh lei ahta k’she vai kä ng’ngah tüh khai.

        Nu gui päng cuh k’hmo hta ami puk khui-ah om hleih ami hmat tu-ung leng neh ak’thui, ak’kha, am’shiip gui cuh ei tu hlü lang neh hloi ci gui. Ami hteh hton nak vai gui cun phih ng’ngaih nak ci gui. Ami ei awk hlü kä ei awk-eineh, ami hteh hton nak hlü-ah kä hteit hton-ein neh k’cha k’ko pum cuh ng’phep neh om gui.

        Cun kon-ah mä ak’hmo ng’tüi lo tu hleih m’neh m’oh nak nu cuh bui lo ba ci gui. Cun-ah ami m’neh nak, yai ca nak cuh am hta k’hmo-ah kyah ami ng’yak lo-ung yai nak gui cuh yei nak-ah ang’thong  cuh hta yop ci-ah nu nu gui mi teing tu-ung mi hmat khai-ah kia ci.

      Nu nu gui cuh ami hta na lo vai-ung ami kyä hlacuh shi kho lo hleih  m’neh neh kyap ci gui. A k’hmo hta tumat noh anu noh i hlok-ah yai ca neh ahta nak a hamat vai pyei kom amät noh a mät phih hngo kä hmat khai. A mät noh amät k’hngim hta hleih a ih hngo kä hamat khai.

       Mi van noh mi nu-ah m’hngi nak yei nak gui cuh mi ng’ngah tüh ba shüm ko. K’hmo hta akyah lo-ung pei-ah om tu ca k’chang gui noh phih k’büi tu neh nu-ah tui tu nak-awn k’hmo cuh k’büi ci. K’hmo cuh cun-ah k’chang-ah hngun ghün nak cuh agah tu lah nu pa goi cuh ei vai chah, I vai k’pai lo ci goi.