Catholic K’Chàng hlû m’thêinak lah K’Chò gui.
K’Chò gui cuh RC Htahtana noh a m’thêi ah K’Khânpùghí lah RC ung om ci gui bäng aktúng ah hmat ci gui. Ahei pahta gui,UN nghtòi gui ung om ca kä ni ciah thùng-yò kphyìm gui lah thùng-yó kthài gui cuh Papa Shangpughang noh khòngmàng neh ngshúng yäih khai ah mi nu Htahtana noh a bi gui kä hmat tu pha ci cuh akdá tu ba ah kya ci.
Acun cuh khòmdek kchàng phùng noh (kä RC noh phih) ami hmat tu vai ah htahtana ah shä-à guk thén gui ah kya ci.
Cun gui kä hmat neh pahta kchàng gui kä mi kya en ba vai ah mthêi vai cuh tuhchü khmó kthô gui vah om ci. Kchò khmó gui cuh Kchò khò lah K’Chò K’chàng bäng ah kä kya hleih mikmi on ngkhing ngkhong ci gui phung ah lam mshüm ah kya khai gui ah tuhchü hnguh hmat tu ba ca ngvai gui noh lam ami leh püî gui vai hlü ci.
RC Htahtana cuh amät ah ngbú im RC ka vai bäng teng ca kä kya neh a hngùn kghing phung ah om nak kum kyüì ngleilài ung om ci gui phung ka vai ah ngah-tüh mthei mthang neh khongmang bilo ca kya ci.
Papa Shangpughang gui ah kchàng hlu lah ghunkho mòòng ung aktúng pi ah ngkhäh ca gui.
1891 ung Papa Shangpughang Leo 13 noh(Rerum Novarum) ”Workers’ Rights:critique of socialism and capitalism”ciah nghloh nghngih ca kchang gui ah gah khin mong guk ci.
1931 ung Papa Shangpughang Pius 11 nak noh (Quadragesimo Anno) ciah Mkhäh Ca Ngmìng on”Social Order:Subsidiarity:critique of economic inequality ciah hlummlei mong ung kä tàgá ci gui mtúng neh guk ci.
1937 ung Papa Shangpughang Pius 11 nak noh(Divini Redemptoris)ciah mkhäh ca ngmíng on”Condemnation of atheistic communism”Kkhânpùghí kkà yùm mong a mshuk kchák nak guk ci.
1961 ung Papa Shangpughang Johan a 21 nak noh(Mater et Magistra)ciah mkhäh ca ngming on”Social justice:Church’s role ineconomic development”hlummlei mong dämtài nak ung Htahtana ah mà nak ci neh guk ci.
1963 ung Papa Shangpughang Johan a 23 nak noh(Pacem in Terris)ciah mkhäh ca ngmìng on”Peace,human rights,Cold War diplomacy”dim kyäp nak kchàng ah gah khîn gui ciah mòòng mtúng neh guk ci.
1967 ung Papa Shangpughang Polu a kchuk nak noh(Popularum Progressio)ciah mkhäh ca ngming on”Global development,economic justice”Khòmdek pum hlüng tàinak,hlummlèi mòòng tàgá nak”ciah mtúng neh guk ci.
1968 ung Papa Shangpughang Polu akkchuk nak noh(Humanae Vitae)ciah mkhäh ca ngmìng on”Human Sexuality;rejection of artificial contraception”Kchàng ah ngyôngpòmnak;kyä mah ah ngshéi mòòng mshuk kchák nak ciah mtúng neh guk ci.
Cun kon ah phih Papa Shangpughang gui noh kchàng gui ah thùng-yò,om ih,hlùmmlèi mong,ghunkho mòòng biloh gui on ngkhing ngkhong hleih ngshung hngei taga neh htingling chüi khá hleih om ip neh ghin-hlei vai ah khòmdek kchèng gui van am ami mthei mkhäh ca nglep ghà om ba ci.
òi lo ca guk nak ba gui ung RC bäng ah kä kya neh kchàng van ka vai ah a i ah ami mtheimcäì biloh gui mi teng ba ko.
.
