Kyànca lah K’Chò kkhúishûi gui ( 5 )
Kyànca ung k’khúi shui m’tùmtäng gui cuh akdá mi hngu hnging ci.
Bói Jesu mät KKhanpughi pang hngo noh i ah kya hleih ang kkhuishui mtumtäng neh a na béit mcäì mthêimthang gui ang? Ngthukni ung Boi Jesu noh kä kkhuishui mtumtäng ah i kä pyein ci ciah a guk mi hngu hnging ci.
A i ah kya hleih kchàng gui cuh a htìnglìng ah a i bo ami hei pyéin vü ang?Kkhuishui mtumtäng kä cung kkhuishui lalei ci cuh a phu kä khin hnging ah hnguh hmat pyi gui cuh ngya tu ci noh hle kä ci hnging khai ah amik ui lah a mlung ung hmáng ge neh a hnguh vai hlü ah pyéinhlak ah kya ci.
A cun ah pyéinhlak gui cuh a ngnéng düt ah pyéin ah kä kya neh a htìnglìng a chüì khá ah ngthunghtà pyéin hlak lo ung hnguh ngyák shan ah kya ci.
Nu pa gui noh ami hta gui ami beit lo ung,nu ghi pa ngvai gui lah saya gui noh ami beit mcäì nak gui ung lah khongshä tuingbang nak gui ung kkhuishui mtumtäng pui on mkhah neh ami ci lo ung mchŭt näng shàn ci gui ah kya ci.
Kyanca ung Boi Jesu noh a kkhuishui mtùmtäng bäng ah kä kya neh ahei gui ung phih akda mi hngu hnging ca kya ci.
Aktúng pí ah Ni KShé Mcha neg hnguh hmatnak Wisdom,Kkhuishui mtùmtängnak(Proverbs) lah Ecclesiastes,Eclesiasticus lah Job ung phih akkhak mi hngu hnging ci.KCho kkhuishui gui cuh Kkhânpughi ah Kyanca on mtùmtäng nu khma vai ah kä kya te ci cuh KChò gui ah phäh ah a phù akya ah kyüì kkyang ca kya ci.
Cun ah a phu kyüi tu lang pang hleih phih u noh kä gu then teipai hleih chük maih yop düt khai ah kya chütah RVA ung kah Saya Om Päng noh hngu hmat ci gui phung htehshi neh gu-thén neh a mcun cuh tukbäih a guk lo ah ci.
A cun ah a guk then gui cuh (A)ung ka noh (Y)ah chüt hleih a ngtäp ah a guk ah kya ci.
Tukbäih cuh(D)ung ka noh léng neh guk lo ba a kya ci.
Dâi ah mlung kshé.Dóng vai kä lô ci ngdót vai lô ci.
Dòng ei k’cêi ci a m’kyah.Dó no khot chüng neh khmó noh ngvái mcäì ci.Dâi ah htàng nän.
Mdap ah hngù ah lí mgòng ktûn.Kdüh vai kdüh vai.kä kdüh vai kä kdüh vai.Mdêi lah mshîn atäng.Kdaih ung shi neh lúk ung htá khai ah kya kon ah.Èi hlü ma ah khtang ùm kthoh.Èi neh mkyûk hleih kä èi kä èi neh a mkyûk tu.
Êi kkhit uih neh ók kkhit mnàm ci.Ei vai ah buh òk vai ah tui.Ei hlü ci am mbei neh o hlü ci am tu man.Ei shüm neh ók hmat màn.
Ei däm ei yo.Ei k’ei om hleih puk poi a kkah.Ei man pyein neh nglo neh nglo man pyéin ei man.Ei hta kyih neh ei nu ung lut ci.
Shin ah KCho kkhuishui gui cuh amshah khmo ktho gui noh kä hmat khai ah kya ci.A i ah kya hleih ci ung tuhchü cuh ngvai gui ah hlo ah khuishui mtumtäng neh nghtangko ci gui kä dá lo ba ci.A ngtäp ah guk yop ah a kya ung thúk ci gui cuh kchi ngnéng on kphlàn neh taih ba vai ah kya ci.
Ashin ah kkhuishui gui mi hmat ah akya ung ngthukní kyanca gui on mtumtäng neh kchàng gui mi béit mcäì lo ah akya ung chüt gok khai ah kya ci.
KCho thung KCho mgong hmat neh mi pughi pa ah hlo ah htìngling chüikhá neh mi om hnging vai ah Ngthukní on mtumcoih neh mi om hnging vai ah mi kthá na ko.
