Nu Pa gui-ah M’hngi Nak-awn M’htei M’hta Nak

Hta k’mo gui vuuk nak ami hnguh yah-ung nu pa gui noh ngäng neh teng m’kyein neh m’htei m’hlang gui vai hlü ci. Kä cun-ung ngami gui vuuk nak ak’däm hnguh hning ci gui-ah kia ci.

Ca guk k’chang, ca cüm hngu hmat ca k’chang-ah kia ci-ah Willian Barclay noh ca tumat-ung a guk nak-ung kah ni m’thein tu ba gui hlü nei.

Yung tumat-ung m’cha m’lang k’chang tumat noh hle hlak-ah phäh-ah ami ng’shi k’ca yah-ung m’cha m’lang lah cun-ah k’hmo-ah pa cun phih upatei ca uk gui ca then neh bi lo ca k’chang ng’vai-ah kia neh ka hmat ci. Ca na om ih cuh na pa-ah ng’ming na m’di-awn kä täng khai ma? ci neh ng’shi hleih ak’hmo noh kawp hta neh a pyein cuh “kei vuuk nak gui ka bui awt yah-ung pa-ah peit neh k’hnga k’plang nak gui ka ng’shi ci. Cunte ani cuh upatei ca uk gui gu thein ca kia neh kä ng’shawng ci ci neh vah nak m’shang ba hti ci.” ci neh pyein ci. Ka pa cuh upatei hngu hmat ca k’chang van noh ami aa ca tu-ah k’chang cunte kei lei cuh ka kyum lo khai-ah kia ci” ci neh m’shang ba ci.

 Nu Pa gui noh  ami hta k’hmo gui cuh acing pe neh kä mi m’htei m’hta-ah akia-ung acein-ah ca ca guk ca k’chang vai hlü-ah mi hta k’hmo gui cuh mi chum bui hning ca kia ci.

Hta k’hmo hta gui päng cuh nu pa gui-ah m’hngi yei gung htawt nak gui gui ng’ya hlü ci gui. Ngami gui-awn ng’hta ng’ko nak gui ng’ge ng’shawi nak gui kä bi hnging-ah kia-ung vuuk nak gui cuh hnguh hnging ci gui-ah kia ci.