Pâhtâ yùmnak gui ng’htàngkònak
Ng’htàngkònak ci gé ung tumat ah pyêin bäng ah kä kya en hleih tumat ah pyéin tumat noh ng’ngài tu kyu hleih tumat ah yùm ah pâhtâ tumat noh kä hlühlòng mlet mhlê en hleih hlûi tä tu ngkyu neh ng’gèngshòi cuh pyéin hlü ah kya ci. KChàng phungphung cuh amät ah yùm lah ngngaih cuh bä pí neh ni pí ciah ng’ngai ci. Acun ah kya neh amät ah yùmnak gui pyéin lo ci noh amät bäng noh pyéin hlü ci. Ahei gui ami kchî kkyô nghtàngkò tu kshùng yah ung a nglak düt ung phupit neh kbàn neh pyéin nak gui va om vü ci. Cun ah hlo gui cuh ngói ah khò ngshông ung kchàng kkhak on lä ah kyäp nep ah ngah-tüh nghtàngkò nak gui ung kä nghloinghlak neh ngkyoh ngleh khai kya ci ciah a mòòng cuh Mghìnghlô Pìgò ah kah Budha Pâhtâ ah mòòng akní ah hnguh hmat neh yùm ca Pùghí Ngthàng Khò Gêi lah Catholic ung kah RVA ung bi tu ca Saya Ngthàng Om Päng on ani yùm ah pâhtâ ah mòòng ani nghtàngkònak gui cuh ani nghnguh tä hleih kyäp nep ah hlà yàng neh ani nghtàngkò cug hngu ngya tu ci gui noh phih ami yùm ngak tu goi ah kya ci.
Pùghí Ngthàng Khò Gei cuh Budha ung ami ngmìng tháng. ci gui ah phungki gui hngô noh ami yùmmnai tu vai ah hnguh hmat ciah kchàng ah kya ci. Ani noh a pyéinnak ung Budha cuh ka yùm te ci cuh acun ah ka yùm cuh a ngyüvü ah kä càng ciah pâhtâ ah akya hman ung ka yùm tu cuh a kholä ah akya vai ah na m’ä neh ka kyi ca kya hleih akya ah kthá na neh Budha ah mòòng ca ngbú gui ka hnguh päng teng neh ka k’hleih hnging phùng cuh k’hleih neh ka teng gäkgäk ci ci ci. Akcàng pyéin ah akya ung Budha ung phih kyai,Catholic Htahtana ung phih kyai ani ah hlô cuh akya ah kèn ca kya ci. Avan ghep cuh nu pa phäi na pughi pa ah yùm man ah kya hleih thùng màn yò màn düt ah yùm ah kya ci.Cun ah thùng màn yò man ah ngdäih ah yum cuh ngthong nghlat neh yumnak akcàng ah kä om hnging ca kya ci.A i pâhtâ ung phih bä ca kchàng gui cuh chà tu hngá ca yumnak tha u neh ami mlung ngngaih yumnak gui akcàng ah ngthong nghlat hleih ghìng hléi ca ghinlù yum nak shäm ci gui ah kya ci.
Shin ah Htum KCho Kho ung pahta yumnak gui mi teng lo ba ah akya ung Budha ung om ci gui cuh akdá pi ah KChò thùng ah mghungthâ lèikhéit ci gui ah kya ci.Akcàng pyéin ung Budha noh a hngùn kghìng ngòn neh lèikhéit vai pyéin kkòm mlîng hta düt hngô kä ngón vai ci ci. Cun hlok ah ahtìnglìng phìngvìng tu kcàng ah kthá na neh ngnaih na neh om vai a Budha ah mcäi gui läk vai ciah hngu hmat neh läk ci gui cuh KChò Budha gui kut pyang kkhêi neh gah vai hlok hngo ah kèn cú ca kya ci. Acun hlok ah kèn ci gui ung Pughi Ngthang Kho Gei cuh tumat ah kya ci.Ani noh a pyéin tumat cuh kchàng phung cuh a mät ah yùm bäng kä kya hleih. ahei gui ah yùm ah mòòng gui phih ngshi kca tu nehca ngbu gui shui teng tu neh kä hmat gui ngthumang tu neh nggéngshòi nghtangkò vai ci ah pyéin ci Cun ah pyêin hnging vai ah kä ngcuh ngcan kä mlùng kshé vai ci ci. Ani ah pyéin gui cuh mikmi RC gui noh phih mi thêibang tu hnging ung ni khai kya ci.Acun ah mi ngthong nghlah tu hnging vai ah mà neh mi mät noh mi mät mi hmat vai cuh aktúng pi ah kya ci.Catholic gui teng lo ba akya ung phih thùng màn yó màn ah a mcäi läk ci gui da ca kya ci.Amshah cuh a pahta ngming hngo akni ah kä hmai ci.
Amshah cuh ami hmat ei ung phih a pahta ngmìng ah a mòòng akpüh akkheh ah kä hmat hmat ciah kya ci. Kyün Khngüp ung ngbum im ah hteh vai,pòi khngüp ung kä hteh ung kä bä khai,á;pat kä phyêi nak ba sho lo ci phyêi ba vai kya khai ciah ngngai düt ci om ci. A i ah kya hleih mü hngün khó ngói ktàigü,a i ah kya hleih phayakyong hteh a i ah kya hleih puti cik,cun gui bi ung mä shih lo ung Kkhânmopi ah gok tu kcang vai ang ci gui cuh shui ktäih ci gui noh vah ami yumnak cuh hngu hmat tu kcang khai gui ah kya ci.Pughi Ngthang Kho Gei noh a mät ah yùm ah Budha ktäih laih laih netah ahêi yum nak gui phih a shui ktäih ah hlô ah mi kya tu hnging vai ah(Interreligious Dialouge)ciah amòòng ung guk lo ah kya ci. Toi ba neh taih ba gui vai läi cuh Christian yumnak ung ani noh käh hmat hnging ah amòòng gui Saya Om Päng am a ngshi chütah a mshàng ba gui cuh taih ba vai kya ci.
Inter-Religious dialogue
