Jesu nawh a sih vai-a màwng a k’thum veinák piéin ci.
Jesu, Jerusalem-ah a hteh zah ung a-hlu-läk gha-leigoi cuh, düp-ah chü gùi neh a piéin cuh, “tuh-bäih, mihmí Jerusalem-ah mi kai ung k’chàng-ah htá cuh, k’tài-gü ng’vái gùi ni, k’chü m’cäi k’süm gùi-ah kut-ung àp u hleih ngamí nawh a sih vai ah ci lo khai gùi. Ani cuh, m’lep m’hlè neh tuthat neh sing-m’kang k’tung-ung ami tai vai-ah, a hei k’chàng gùi-am ap lo khai gùi. A k’thum k’hngüp-ung, ghing lo bà khai,” ci neh piéin ci.
Cun zah-ung, Zebedee-ah a htá goi-ah nú nawh a htá goi mah-ah a pèi-ah k’et lo nehtah m’khúk dàwng neh ng’hui lonák ci. Jesu nawh “A i na ng’zák hlü ci ang?” ci neh ng’si hleih “Na ghunkhàw-ah sin-ah ka htá goi cuh, tumat na k’pat täng-ah, tumat na k’eng täng-ah ani ngoh vai-ah na piéin vai,” ci neh piéin ci. Jesu nawh phih, “Nang-mi nawh i, nami san kä nami hmat ci. Kei nawh ka áwk vai-ah bäít htá, nami awk hnging khai ang?” ci neh ng’si hleih “áwk-hnging vai,” ci neh m’sàng bà ci gùi. Ka bäít-htá cuh, nangmi nawh nami awk tu k’càng khai-ah kia ci. Kei ah k’pat täng lah k’eng täng-ah ngoh vai cuh, kei nawh kä ka pe hnging ci. Cun-ah ngohnák gùi vai cuh, Ka Pá nawh bü neh a pian péit gùi-ah k’chàng gùi om pi ci.
A-hlu-läk ghà nawh ng’za tu u neh cun-ah ng’phäi-ng’nàü goi cuh, kä zèinák ci gùi. Jesu nawh ngami, a pèi-ah chü gùi neh a piéin cuh, “k’chàng gùi ung sàng-pùghang gùi nawh akia-ah ’kànák gùi neh a ng’vái tu bà gùi nawh ami ã ami m’dáng cuh, nami hmat ci. Nangmí-ung, cun-ah kä kia vai. Nangmí ung bä pí hlü ci cuh, nami phàn-ah k’chàng-ah a kia vai.Nang-mí-ung-kah k’tài pí hlü ci cuh, nami phàn-ah a kia vai. 28 k’Chàng-a htá cuh, a ng’phàn vai-ah phäh-ah kä kia neh a mät ami phàn vai-ah phäh-ah kia neh a hngùn m’sih neh k’chàng a k’phión vai-ah phäh-ah lo ci-ah kia ci.
