K’Chü m’cäi k’süm lah Pharisee k’chàng- ng’séi gùi.

 Cun zah ung Jesu nawh k’chàng gùi lah a-hlu-läk gùi àm, a m’thein lo gùi cuh, “k’chü m’cäi k’süm gùi lah Pharisee gùi cuh, Moses-ah hngün thong hlók u neh ani-ah m’thei m’cäi ngoh-nák-ung ngoh ci gùi.  Cun-ah kia hleih ami piéin phùng-ah nami kia vai. Ami om-ah kä nami om tu vai. Ngami cuh, m’thei láng u neh kä bi ci gùi.  A i-ah kia hleih ci ung phui neh kä m’chüt hnging vai-ah phuih-koh cuh, k’chàng gùi-ah k’phlèing-ung taih ci gùi. Ami mät nawh kut m’dàwng htá düit-awn phih kä k’hngün hlü ci gùi.  Ami bi,k’chàng gùi nawh ami hnguh  vai-ah bi ci gùi. Cun-ah kia hleih cã-ng’tän a ng’gho ng’gho-ah m’koh neh hlui-piai hlo-lam lam khai-ah ci ci gùi. Ei èinák ung k’hmà gùi vai lah cãgat-ah a ng’taipí-ah ngo hlü ci gùi. Zoih-tuknák zah-ah ami k’chü ng’htà püi vai, ‘Saza ng’vái’ ci neh ami chü vai zùm ci gùi.

Nangmi cuh‘saza ng’vái’ci neh ami ning chü gùi vai, kä ng’za hlü vai. A i-ah kia hleih ci ung nami saza ng’vái tumat bäng om ci. Nami-van cuh, ng’phäí-nàü k’chü-ah nami kia ci. Khaw m’dek ’khãn-ah, a u phih ‘Pá’ ci neh kä nami chü vai. A i-ah kia hleih ci ung Khãnmòpí-ah om ci-ah, nami Pá tumat bäng om ci.  ‘Saza ng’vái’ ci neh ami ning chü vai, kä nami ng’zák hlü vai. A i-ah kia hleih ci ung nangmi ung Saza ng’vái tumat bäng om ci. Cun cuh Christù-ah néi kia ci. Nangmi ung  ng’vái-pí hlü ci cuh, nami phàn-ah k’chàng-ah a kia vai.  A mät nawh a mät m’tam ci cuh, m’zo m’nem-ah kia khai. A mät nawh a mät m’zo m’nem ci läi m’tam ah kia khai.