Khanpughü-ah Pa K’khui Pyan Tham Nak

Ghü neh ghüh-ah Pa k’khui lah Moses cuh hla lai ma-ah ami hteh yah-ung shin gui cuh bui ci gui. Ngami noh tumat ku ku ami ng’yak hlü aom-ung Khanpughü-ah ami shan vai-ah k’dam Moses-am kat m’hluk ci gui. Isarael pa khui gui ami ei vai a maih lo-ung khanmopi-ah kah m’htut gui cuh kho k’aa vai hlü-ah yu k’chak lo gui nak-awn Khanpughü noh apa khui k’chang gui cuh i hlok-ah am’hngi gui cuh m’dang ca kia ci. Cun-ah ei cuh mopi-ah kah lo ca ei ci neh chü-ah kia ci. Mü hngün ei meh ami ei hnging vai-ah phäh chikhngüp ng’nong gui cun phih ami ma-ah tüi lo ci.

Heberu pa k’khui k’chang gui cuh Khanpughü noh ni bä nak ak’khak leng leng pe gui hleih phih ngami cuh ami ng’yak hlü gui kä ng’päng ci. Tui kä om nak hla lai ma-ah ami gok lo yah-ung kat m’hluh ba mä ci gui. Cunte Khanpughü noh Moses-am a ng’sho htung-awn lung a m’ghuih vai pyein neh tui cuh luh lo hlak ci.

Khanpughü noh a ghü-ah pa k’khui cuh m’hngi gui ci. Ngami ka vai ak’da bi pe gui ci. I kia hleih ci-ung shin-ah pa k’khui-ung ka noh kho m’dek k’chang gui van cuh phion nak gah lo vai phäh kia ci. Caw kia hleih Khanpughü noh ani cuh Isarael pa khui k’chang gui-ah Khanpughü-ah akia-ah mong, Isarael pa khui cuh ani-ah pa khui k’chang gui-ah ami kia-ah mong cuh am’dang hlü-ah phäh-ah ngami gui-awn ng’thu khän nak cuh bi ci. Khhanpughü noh Heberu k’chang gui cuh a yei nak gui-ah ak’khak-ah ang’ngaih gui-ah hta k’hngu hta k’pa gui-ah kia hlak gui ci. Khanpughü noh ami läk vai-ah am’cäi nak gui cun phih pe gui ci.Khanpughü noh Moses cuh Sinari m’thung khan-ah chü neh a hngei u phih kä ng’läk-ein lo tu vai-ah m’cäi ci. Moses cuh kho m’htung pum kho ng’mei loh k’hngim neh vei hleih kho k’hngüp k’sho Khanpughü-awn ng’hta ci goi. A cun-ung Khanpughü noh am’cäi mong gha cuh pe ci.

Moses noh Khanpughü-ah m’cäi mong gha cuh a htin nak vai m’kyüm cuh pyan hlak gui ci. Cun-ah m’kyüm cuh ng’thu khän m’kyüm ci neh chü-ah kia ci.

Cun-ah ng’thu khän m’kyüm cuh Isarael pa khui k’chang gui-ah ng’lung-ung Khanpughü om tu ci ci-ah a ng’hmat nak vai phäh kia ci. Shin-ah ng’thu khän m’kyün cuh Isarael pa khui k’chang gui-ah suh shan nak lah m’shum chuk m’hlüng m’tai nak-ah lam kyum-ah kia ci. Ngami noh Moses cuh güng lo k’chit u neh ghui hlei müi k’tung k’hlüm u neh Khanpuhgü hlok-ah shum chuk ci gui. Cun-ah ami om kya gui noh Moses lah Khanpughü cuh ani m’lung m’sheit goi ci. Cunte a k’cang-ah ng’tu ng’yawn ba ca k’chang gui cuh m’gein ba neh kä ng’yu ng’yawn tu ba ci gui cuh am’shih nak gui-awn ng’loh ng’chan hlak gui ci.

Isarael pa khui gui cuh Khanpughü-awn ng’peng lo ci gui-ah kia ci. A mi kat nak gui ami ng’yu ng’yawn ba güt chüt hleih Khangpughü noh tan pe gui ci. Khanpughü-ah m’cäi ng’ngai neh ani yum äp ci cuh ak’kyen hta k’puih lo ba ci. Ngami gui cuh tui-ah hti geit-ah ng’hleh nak kho lei k’ni-ah khah püi gui ci. Ngami gui-ah k’kyong khui päng-ung hta k’hngu hta k’pa gui pung chei hlak gui neh mang hlak gui ci. Kho m’dek khan-ah Khanpughü-ah mik hmuh nak-awn Khanpughü k’cang hmat neh m’shum chuk ca pa khui k’chang gui-ah kia man te ci gui.